Të gjitha komunave Qeveria po u ndan mjete për projekte për kanalizim, shkolla e rrugë, e vetëm në Gostivar të hollat janë paraparë për rinovim të spitalit, që nuk është kompetencë e komunës, ankohet kryetari Arben Taravari.
“Aspak me atë nuk i ndihmojnë pushtetit lokal, por i ndihmojnë përsëri pushtetit qendror, faktikisht kjo është një mënyrë e blerjes së votave prej qytetarëve para zgjedhjeve lokale dhe parlamentare shpresoj, kjo është ajo që, të shprehem, si brengë e jona, që nuk duhet të ndodhë, duhet të gjitha komunat të shihen si subjekte të barabarta por ne jemi mësuar dhe vazhdojmë tutje…”. – deklaroi Arben Taravari, Kryetar i Gostivarit.
Nga Qeveria thonë se kriteret për ndarjen e mjeteve nga Programi TAV janë caktuar paraprakisht dhe kanë vlejtur për të gjitha komunat.
“Të gjitha komunat ishin të ftuara që të dorëzojnë projekte me dokumentacion të plotë deri të miratimi për ndërtim. Projekte kanë propozuar edhe ministritë. Më pas, të njëjtat kanë qenë lëndë e evaluimit nga komisioni profesional në Qeveri, i cili ka kryer ndarje të barabartë të mjeteve të programit TAV.” – Qeveria e Maqedonisë Së Veriut.
Megjithatë Qeveria nuk përgjigjet konkretisht se pse për në Gostivar janë ndarë mjete për spitalin, që nuk është kompetencë e komunës, por e pushtetit qendror. Apo, nëse komuna paraprakisht vetë ka aplikuar për një projekt të tillë. Dokumenti i ekzekutivit për këto projekte, në pikën për Komunën e Gostivarit shkruan se ndahet “në pajtim me kërkesën dhe dokumentacionin e projektit”.
Paratë për komunat janë nga rialokimi i mjeteve me të cilat duhej të ndërtohej aeroporti kargo në Shtip, sipas marrëveshjes me TAV-in në vitin 2008. Vlera e këtyre projekteve është gjithsej 35 milionë euro, për realizimin e 99 projekteve në 75 komuna.