KërkoLAJMET

Putin kushtëzon eksportet e drithërave të Ukrainës me lehtësimin e sanksioneve

3 orë më herët

Presidenti i Rusisë, Vladimir Putin, duket se ka kushtëzuar rihapjen e mundshme të eksporteve të drithërave të Ukrainës me një lehtësim të sanksioneve, që Perëndimi vendosi ndaj Moskës pas nisjes së pushtimit të Ukrainës. Por, presidenti i Francës dhe kancelari i Gjermanisë u kundërpërgjigjën se për lehtësim të sanksioneve duhet tërheqja e trupave të Rusisë dhe një përpjekje “serioze” për paqe nga Moska.

Në një bisedë telefonike më 28 maj, Putin i tha presidentit francez, Emmanuel Macron, dhe kancelarit gjerman, Olaf Scholz, se “Rusia është e gatshme të ndihmojë në gjetjen e mundësive për të mos penguar eksportin e drithërave, përfshirë edhe eksportet e drithërave ukrainase nga portet e Detit të Zi”, njoftoi Kremlini.