Punojnë nën tym, marrin pagë 20 mijë denarë! Zjarrfikësit të revoltuar, Shilegov i quan “manipulatorë”

TË FUNDIT

Nën tym. Herë me pajisje mbrojtëse, e herë pa to.
Edhe pse shpëtojnë jetë të të tjerëve, vështirësojnë të veten.
Kështu zjarrfikësit punojnë për të siguruar kafshatën e gojës.
E tërë këtë punë po e bëjnë vetëm për 20 mijë denarë, pasi muaj më parë Qyteti i Shkupit ua shkurtoi pagat për 20 për qind.

Por siç bënë sektoret tjera, edhe zjarrfikësit filluan të ngrejnë zërin. Kërkojnë rritje të pagave.

“Zotëri kryetar i Qytetit të Shkupit, Petre Shilegov këtyre heronjve me vite të tëra nuk u jepen 20% nga rroga. Nuk paskan punë të rrezikshme. E gjithë bota na lëvdon, për fat të keq te ne të nënçmuar. Qysh këtë muaj t’i ktheni mjetet në rrogë”, reagoi zjarrfikësi Nuredin Mustafa.

Sindikata e Zjarrfikësve të Qytetit të Shkupit ka kërcënuar edhe me protesta, por për këto të fundit nuk ka dëgjuar ende Shilegov.

Thotë se shkurtimi nuk ka ardhur me dëshirën e tij, por se janë shkurtuar bllok dotacionet. Ndërkaq reagimet e zjarrfikësve i sheh si manipulim. 

“70 milionë denarë Qyteti i Shkupit ka paguar dy vitet e kaluara, për orët shtesë për paditë që i kanë dërguar. Mendoj se bëhet fjalë për keqpërdorim apo manipulim nga zjarrfikësit. Kurse e di se ka qenë në plan por sërish do të duhet të shqyrtohet gjendja në buxhetin qendror për rritjen e bllok dotacioneve. Për mua mbetet imperativ që pajisjen mbrojtëse ta rrisim në nivel të lartë”, tha Shilegov.

Por nëse kërkoni në internet, ndër lajmet kryesore që ndërlidhet me Shilegovin dhe zjarrfikësit, është premtimi i tij që do të ketë punësime të reja.

Punësimet e reja i premtoi edhe sot.

“Do të shpallet konkurs për punësim të më së paku 30 zjarrfikësve”, premtoi sërish Shilegov.

Punësimet kishin për qëllim të rinojnë moshën e zjarrfikësve, që ata që janë në moshë të shtyrë, të shkojnë në pension.