Ndryshimet në Kodin Penal u votuan pas një debati të shkurtër prej vetëm dy ditëve. Duke shfrytëzuar flamurin europian, me shpejtësi kaloi nëpër Komisioni për çështje europiane, e pasdite u gjend para deputetëve në seancë plenare. U votua vetëm nga LSDM dhe BDI. Kundër votuan shumica e deputetëve të VMRO-DPMNE-së, por jo të gjithë. Sipas listës nga rezultati i votimit, pesë deputetë të kësaj partie nuk kanë votuar fare ndërsa gjashtë kanë munguar.
Po këtë e demanton deputetja Eli Panova.
“Të gjithë deputetët të cilët ishin prezent në sallën e Kuvendit e që janë nga VMRO-DPMNE dhe koalicioni votuan kundër. Në sallë kishte 104 deputetë të regjistruar dhe në sallë po, kishte deputetë të cilët nuk votuan dhe ishin nga shumica qeveritare e këtë ju shumë mirë e dini.”- tha Eli Panova, deputete e VMRO-DPMNE-së.
Mes deputetëve të cilët votuan kundër ishte edhe ajo e RDM-së, Maja Moraçanin, që është pjesë e shumicës.
“Konsideroj se këto ndryshime që dje u miratuan nuk ndihmojnë në luftën efikase të korrupsionit dhe krimit të organizuar. Kjo për mua është shumë e rëndësishme edhe për ne si RDM. Jo nuk kam informacione të tilla se ka patur marrëveshje. Opozita votoi gjithashtu kundër. Por nuk kam informata të tilla nëse ka patur bisedime të tilla mes pozitës dhe opozitës.”- tha Maja Moraçanin – kryetare e RDM-së.
Meqenëse këto ndryshime lidhen me emrin e tij, ish kryeministri Nikolla Gruevski u prononcua me shkrim në Facebook. Edhe ai mohon se këto ndryshime kanë të bëjnë me kthimin e tij në Maqedoni.
“Në çdo 2-3 muaj u bie ndërmend spinet t’i drejtojnë kah unë, në drejtim të kinse marrëveshjeve joprincipiele me dikë ose diçka, konspiracione ose ngjashëm, dhe ja disa vite në mënyrë periodike paraqitet nevoja t’i demantoj, njësoj siç po e bëj tani në këtë rast, ku përsëri e demantoj të njëjtën. Unë dhe bashkëpunëtorët e mi jemi nën përndjekje për vepra të pakryera. Prapavija e kësaj përndjekjeje është frika nga konkurenca dhe dëshira për eliminim politik.”- shkruan në fejsbuk Nikolla Gruevski, ish-kryeministër.
Se këto ndryshime kanë lidhje me Gruevskin, të bindur janë nga Lëvizja Demokratike. Ata përmes një komunikate shprehen se pushteti BDI-LSDM-ASH përmes këtyre ndryshimeve do të ndikojnë direkisht mbi veprat penale të Gruevskit.