Qytetarë të shumtë të mbledhur sot para stacionit policor në Ferizaj kanë protestuar në shenjë revolte ndaj vrasjes së 18 vjeçares në këtë qytet. Protesta u organizua nga Qendra Kosovare për Studime Gjinore, ndërsa protestës i janë bashkuar edhe qytetarë të shumtë.
Me parulla të shumta dhe thirrje për drejtësi protestuesit kanë kërkuar dënim maksimal për vrasësit e 18 vjeçares, ndërsa në shenjë revolte kanë hedhur ngjyrë të kuqe në drejtim të Policisë. “Poshtë institucionet patriarkale”, “Jeta e grave hajgare për shtetin”, “Dënim maksimal për Dardan Krivaqën”, “Dënim maksimal për Arbër Sejdiun”, “Duam drejtësi për Marigonën”, ishin vetem disa nga thirrjet e protestuesve.
Organizatorët e protestës theksuan se nuk ka siguri për gratë dhe ato po rrihen, dhunohen në shtëpi e rrugë. Organizatorët kërkuan nga institucionet që urgjentisht të trajtohet fenomeni i femicitit, dënim maksimal për vrasësit, siguri për vajzat dhe gratë në të gjitha hapësirat. Po ashtu u kërkua nga Policia e Kosovës që vajzat dhe gratë të trajtohen me dinjitet kur raportojnë rastet e dhunës./TV21