Protestë para vilës së Pendarovskit! “President mos i mbro terroristët e 27 prillit”!

“President mos i mbro terroristët e 27 prillit”! Me këtë slogan u protestua sot në afërsi të Vilës presidenciale “Vodno”, pas pohimit të presidentit Stevo Pendarovski se është pro rigjykimit të ngjarjeve të 27 prillit nëse ka prova të reja.

Kordoni policor nuk i lejoi të shkojnë afër presidencës, andaj transparentët i shpalosën pak më poshtë rrugës. Portretin e Presidentit, kryeministrit Zoran Zaev dhe atë të Ali Ahmetit me Nikolla Gruevskin i kishin bërë me mbishkrimin “diktator”. Për dallim prej këtyre, tek fotoja e kreut të VMRO-DPMNE-së, Hristijan Mickoski, në anglisht kishin shkruar “qen”.

“Sulmuesit e 27 prillit që e kryen një akt të tillë ndaj parlamentit rrezikuan jetën e deputetëve dhe punonjësve, një veprim i tillë terrorist në vendet e civilizuara do ti dënonte me burgim të përjetshëm prandaj ne sot këtu jemi mbledhur që t’i bëjmë thirrje Stevo Pendravoskit që të mos dalë në mbrojtje të terroristëve sepse demokracia nuk e lejon një gjë të tillë”, tha Blerim Ahmeti, organizator.

I ashtuquajturi “Këshillit Organizativ të protestave për rastet e montuara politike” po ashtu pyetën nëse Pendarovski po e bën punën e Presidentit apo të gjykatësit; dhe pse asnjëherë nuk i komentoi gjykimet e rasteve ku u dënuan shqiptarët, si “Monstra” e “Grupi Kumanovës”.

Në fund protestuesit dogjën fotot e krerëve që mbanin në duar.

Presidenti i vendit Stevo Pendarovski javën që shkoi tha se mund të ketë rigjykim të 27 prillit, në rast se ka prova të reja, ndërsa shtoi se aspak nuk mendon se janë terroristë ata që vetëm kanë hynë brenda Kuvendit në natën e përgjakshme.

“Në këtë moment unë mbështes rihapjen e procesit, nëse ka prova të reja, dëshmitarë të ri të cilët do të hedhin dritë mbi ngjarjen nga një kënd tjetër që do të tregojë se nuk është ashtu siç ishte provuar në gjykimin e parë, ne mund të flasim për këtë”, pat thënë presidenti Stevo Pendarovski, më 29.04.2021.

Kryeministri Zoran Zaev ka deklaruar se asnjëherë nuk ka biseduar për amnisti të të dënuarve për rastin e 27 prillit me liderin e VMRO-DPMNE-së, Hristian Mickovski, gjersa ky i fundit para disa ditësh mori pjesë në një protestë ku kërkohej lirimi i të përfshirëve në natën e përgjakshme të 27 prillit 2017.

Kreu i Aleancës për Shqiptarët, Ziadin Sela, në përvjetorin e ngjarjeve hodhi dyshime se mes pushtetit dhe opozitës maqedonase ka tashmë një marrëveshje për ndonjë lloj amnistimi. Ndërkaq, se kualifikimi “akt terrorist” është shumë i rëndë, në 2018-tën e pohonte edhe kreu i BDI-së Ali Ahmeti, duke u shprehur se nuk do të ishte dakorduar me kualifikimin terrorizëm për ngjarjet e 27 prillit./TV21