Propozimi i LSM-së nuk u pranua, punëdhënësit nuk ishin të gatshëm të diskutojnë për pagën minimale

Nuk ka gjasa që paga minimale në vend të rritet në 500 euro, e as që pagat tjera të rriten për 100 euro, siç kërkoi Lidhja e Sindikatave të Maqedonisë. Në Këshillin Ekonomiko-Social, propozimi i sindikalistëve nuk u pranua, pasi punëdhënësit nuk ishin të gatshëm të diskutojnë rreth pagës minimale.

Kryetari i LSM-së, Sllobodan Trendafilov, tha se madje janë qortuar se kanë kërkuar shumë, dhe se ka pasur akuza për politizim të kërkesave.

Trendafilov tha se punëtorët në vend, sipas të gjitha gjasave, do të vazhdojnë të kenë pagën më të ulët në rajon, që sipas tij janë “për tokë”, për shkak se periudha është e shkurtër deri në shpalljen e zgjedhjeve lokale që do të mbahen në tetor. Deri në mes të muajit të ardhshëm do të mbahet një seancë e Kryesisë dhe e Këshillit të LSM-së, ku do të vendoset për hapat e mëtejshëm.

Nga Konfederata e Sindikatave të Lira thanë se e kishin mbështetur pikën për pagën minimale që të futet në rend dite, por punëdhënësit nuk lejuan që për të të votohet.

Qeveria, nga ana tjetër, qëndron në qëndrimin se ua lë sindikatave dhe punëdhënësve që të merren vesh, pasi vetë nuk mund të mbajnë anë. Ata theksuan se megjithatë ka pasur rritje të pagave në një pjesë të administratës publike.

Në seancë është miratuar edhe metodologjia sipas së cilës do të llogaritet shporta e shpenzimeve të Qeverisë. Ndërsa një seancë e re e Këshillit Ekonomiko-Social pritet të mbahet deri në fund të javës.