Prokuroria Themelore Shkup ka lëshuar urdhër për ndalimin e procedurës hetimore për “Arat e Dellçevës”, përcjell TV21. Arsyeja e ndërprerjes së hetimeve është se anëtarët e Bordit Drejtues të EVN-së i kanë ndryshuar deklaratat e dhëna më parë në prokurori, mbi të cilat është bazuar hetimi.
Nga Prokuroria Shkup njoftojnë se për këtë tashmë është ngritur rast për dhënie deklarate të rreme. Rasti i njohur në opinion si “Arat e Dellçevës” i referohet faktit se EVN Elektrana ka blerë 48 parcela toke në Dellçevë për 40 herë më shtrenjtë se vlera e tregut. Personat që ia shitën arat EVN-së i kishin marrë ato si dhuratë disa javë më herët.
Prokuroria vlerësoi vlerën e arave në treg afërsisht 35 mijë euro, dhe ato iu shitën EVN Elektrana për 1.6 milionë euro.