Priten të arrijnë vaksinat kineze, në proces është nënshkrimi i marrëveshjes për vaksinat Sputnik V nga Rusia

Kryeministri i vendit Zoran Zaev dhe ministri i punëve të jashtme Bujar Osmani kanë dërguar kërkesë deri të ambasada kineze për përshpejtimin e procesit për sjelljen e vaksinave Sinofarm në vend. Zaev pret që ketë jave të vijnë 200 mijë dozat e porositura nga Kina.

 “Dje edhe pse ishte e diel kam dërguar letër, ndërsa sot edhe ministri i jashtëm Bujar Osmani ka dërguar letër përmes ambasadës kineze që të përshpejtohet procesi i ngarkimit të vaksinave. E di që kanë kërkuar datë konkrete për ngarkimin e vaksinave gjatë kësaj jave”, deklaroi Kryeministri Zoran Zaev.

Ndërkohë ne proces e sipër është nënshkrimi i marrëveshjes për vaksinat Sputnik V nga Rusia.

 “Besoj se deri në fund të kësaj jave, gjegjësisht deri në fund të muajit shkurt, vaksinat kineze do të arrijnë. Ndërsa për Sputnik V do të dimë detajet pasi të nënshkruhen disa marrëveshje, pastaj mund të flasim për data kur mund të arrijnë”, shtoi kryeministri Zaev.

Për momentin vaksinimi po vijon vetëm për punonjësit shëndetësor me dozat e dhuruara nga Serbia. Deri më sot janë vaksinuar 1040 punëtor shëndetësor. Vetëm te dy persona janë paraqitur ngritje e vogël e temperaturës informojnë nga Agjencia e barërave.

 “Deri më sot janë vaksinuar 1040 punonjës shëndetësor vetëm dy persona janë ankuar për efekte anësore, gjegjësisht për ngritje të vogël të temperaturës”, theksoi Lirishim Shabani nga Agjencia e Barnave.

Përderisa po priten vaksinat nga shtetet e ndryshme, 63 mijë qytetarë janë lajmëruar në aplikacionin online duke shprehur dëshirë për të marrë vaksinë kundër Kovid 19. Por se kur do të filloj imunizimi i popullatës ende nuk dihet.