Pretendime për “vjedhje” deputetësh! LSDM dhe VMRO-DPMNE kërkojnë të rrisin mbështetjen në Kuvend

Pretendime nga LSDM e VMRO-DPMNE se njëra-tjetrës do t’ia marrin deputetët e koalicionit. Ani pse ka javë që rrotullohen pretendime të tilla, deri më tani asnjë lëvizje nuk është bërë. Tani nënkryetari i VMRO-DPMNE-së, deputeti Aleksandar Nikollovski, sërish e aktualizoi këtë temë. 

-Në këtë moment ka deputetë nga koalicioni i LSDM-së, që nuk janë nga Besa ose BDI-ja, por deputetë të tjerë në kuadër të koalicionit të LSDM-së, të cilët tashmë bisedojnë për shumicë të re parlamentare,-Aleksandar Nikollovski, VMRO-DPMNE.

Kryetari i LSDM-së, Zoran Zaev, thotë se VMRO-DPMNE-së ka filluar t’i fluturojë truri me këto gjëra. Shumica parlamentare nuk ndryshohet pa partitë shqiptare, shprehet ai.

-Me kë do të formojnë shumicë prej 61. Ja po them, që t’i merrni 2, 3, 10, ju duhen partitë shqiptare. Filozofia e të menduarit. Me çfarë baze politike? Me anulimin e tre marrëveshjeve? Për krijimin e Maqedonisë së pastër,-tha Zoran Zaev, kryetar i LSDM-së.

Duke mohuar se do t’i ikin partnerët e koalicionit, Zaev tha se përkundrazi, do të ketë deputetë të koalicionit të DPMNE-së, që do të kalojnë në maxhorancë.

-Mes 3 dhe 6 deputetë, do të vijnë ta mbështesin këtë shumicë për shkak të politikave, për zgjidhjet e propozuara,- tha Zoran Zaev, kryetar i LSDM-së.

Megjithatë nuk merr guximin të tregojë se cilët janë.

-Epo do të mi kthejnë nëse tregoj se cilët janë…

-Gazetarët: Janë deputetë të VMRO-DPMNE-së apo të partive të tjera në koalicion?

-Nëse doni t’ju tregoj nga cili qytet janë?!”,- deklaroi Zoran Zaev, kryetar i LSDM-së.

E krahas pretendimeve LSDM-DPMNE për marrje të deputetëve nga rivali politik, edhe një lëvizje tjetër është paralajmëruar të ndodhë në Kuvend.

Sekretari gjeneral i Lëvizjes Besa, Arjanit Hoxha, thotë se shumë shpejt mund të ndodhë që Besa të bëhet me grup parlamentar, edhe pse ende nuk kanë nisur negociatat për këtë gjë.

-Nuk përjashtohet mundësia që në të ardhmen të krijohet grupi parlamentar i Besës, nuk përjashtohet mundësia edhe me kryetarin e PDSH-së që është deputet, sepse ne e ndajmë pushtetin, dhe e ndajmë pushtetin dhe nuk bëjmë diçka të panatyrshme në këtë drejtim,- tha Arjanit Hoxha, sekretar gjeneral i Lëvizjes Besa.

Çështja e rritjes së shumicës parlamentare, duke kaluar deputetë nga opozita në maxhorancë, është hapur javë më parë. Kryetari i Besës Bilall Kasami ishte i pari që e tha në emisionin ClickPlus në TV21. Për momentin shumica është e brishtë, me vetëm 62 deputetë, që janë nga LSDM, BDI, BESA e PDSH-ja. Opozitës i përkasin 58, përbërë nga VMRO-DPMNE-ja, koalicioni ASH-AAA dhe “E Majta”.