Derisa ekziston vendimmarrja unanime në Bashkimin Europian, duhet të pyesni veten nëse anëtarësimi është gjëja më e rëndësishme për ju, apo ka edhe gjëra të tjera që mund t’ju bëjnë të suksesshëm, theksoi presidenti kroat Zoran Millanoviq gjatë vizitës së tij në vendin tonë. Millanoviq tha se i ka dhënë këshilla presidentes Gordana Siljanovska-Davkova, duke theksuar se këshillat që Maqedonia i merr nga fqinjët, bashkësia ndërkombëtare dhe Komisioni Europian nuk janë gjithmonë të mençura.
“Nuk janë të gjithë ato këshilla të mençura dhe të dobishme për ne, andaj merrni me një dozë të rezervës dhe punoni siç dini. Ju jeni ata që vendosni se çfarë u është thënë. Vetëm mos të bëheni viktimë e kërcënimit dhe ryshfetit, kur është në pyetje anëtarësimi juaj në BE”, tha Zoran Millanoviq.
“Problemet tona janë të ndërlidhura, edhe pse është shumë e çuditshme, për historinë, për perceptimin e kulturës si dhe për gjuhën, gjëra për të cilat nuk bisedohet e as negociohet, por po e përsëris, mendoj se veto do të shkaktojë edhe më tej probleme”, tha Gordana Siljanovska Davkova.
Presidenti kroat, Millanoviq i cili shpesh di të kritikojë Brukselin, por edhe punën e qeverisë kroate, u pyet edhe për bashkëpunimin ushtarak që Zagrebi para do kohe e vendosi me Prishtinën dhe Tiranën. Ai nuk u përgjigj konkretisht nëse Maqedonia duhet të kyçet.
“Kjo është Deklaratë e vullnetit në një formë të caktuar, pa asnjë pasojë konkrete dhe materiale në aspektin juridik-ndërkombëtar. Aty është një anëtare e NATO-së, Kroacia – vendi im, atdheu im. E dyta, Shqipëria, është gjithashtu anëtare e NATO-së. E treta është Kosova, për ne një shtet i dashur dhe mik, por për fat të keq nuk është e njohur nga të gjitha vendet anëtare të BE-së dhe NATO-së dhe nuk është e pranuar në Kombet e Bashkuara. Prandaj, po të isha Maqedonia, po ta përfaqësoja Maqedoninë, për këtë nuk do të mendoja fare, kjo nuk është marrëveshje ndërkombëtare”, deklaroi Millanoviq.
Millanoviq theksoi gjithashtu se anëtarësimi në BE ka anët negative, por edhe pozitive, duke veçuar qasjen në fondet europiane, për të cilat megjithatë kritikoi autoritetet kroate për mënyrën se si i shpenzojnë ato para.