Premtimet për grafa etnike ende të parealizuara! “Besa” në pritje për letërnjoftimet, BDI lë në harresë certifikatat

Po mbushen thuajse dy vite që kur Lëvizja “Besa” kushtëzoi ndryshimet kushtetuese me kërkesën për futjen e grafës së përkatësisë etnike në letërnjoftime. E njëjta ende nuk është realizuar.

Deputeti i kësaj partie, Kastriot Rexhepi, thotë se e njëjta është duke u integruar në propozim-ligjin për letërnjoftime, pasi në një propozim paraprak të Qeverisë, para zgjedhjeve parlamentare, kërkesa e tyre nuk ishte përfshirë në tekst. Rexhepi pret që javën e ardhshme materiali të hyjë në procedurat e Kuvendit, ndërsa procesi të finalizohet në janar.

 “Unë besoj në janar, sepse veçse dhjetori është duke mbaruar, duhet  të kemi parasysh buxhetin, ka një seancë që do të jetë fjalimi i Kryetarit të shtetit, ka paralajmërime që do të ketë iniciativë për interpelancë kështu që mendoj se teknikisht do të jetë e pamundur që të hyjë jo vetëm ky ligj, sepse ky ligj është pjesë e pakos së 5 ligjeve, ligji për shtetësi, për dokumente të udhëtimit-letërnjoftime, për banim, e kështu me radhë, kështu që besoj që këto do të jenë në procedurë diku nga janari”, deklaroi Kastriot Rexhepi – deputet i Lëvizjes Besa.

E derisa “Besa” është në pritje të janarit për të përmbushur këtë premtim, Bashkimit Demokratik për Integrim duket se e ka lënë anash idenë për grafën etnike në certifikatat e lindjes.

Artan Grubi, dikur deputet, e sot zëvendëskryeministër i parë i qeverisë, në dhjetor 2019 pat thënë se janë duke punuar me librat amë për të përfshirë edhe grafën etnike.

 “Vlerësoj që drejtoria e evidencës amë tashmë ka kaluar rregulloren për formën e re të certifikatave ku do të përfshihet edhe kombësia dhe etnia në mënyrë që të tejkalohet ky problem; dhe ka qenë insistim i joni dhe vlerësoj që është çështje kohe e shkurtër kur do të hyjë në përdorim edhe rregullorja e re dhe forma e re e certifikatave e cila do të demonstrojë edhe etninë e individit”, u shpreh Artan Grubi nga BDI – (18.12.2019).

Janë bërë një vit nga kjo deklaratë dhe asgjë konkrete në këtë drejtim. Të paktën këtë e lë të kuptohet heshtja e zëvendëskryeministrit Grubi dhe Drejtorit të drejtorisë për mbajtjen e librave amë, Bujar Dardhishta. TV21 i kontaktoi, por asnjëri nuk na u përgjigj se ku mbeti grafa etnike në certifikata të lindjes për të cilën pohohej se po punohet. Qëllimi i të njëjtës është shmangia e deklaratave të rrejshme të përkatësisë etnike gjatë punësimeve.