Policia e Maqedonisë së Veriut ka realizuar kontrolle për prerjen ilegale të drurëve në Kërçovë, ku vetëm më 3 shkurt, ka kapur në flagrancë tre persona derisa kanë prerë 16 kërcell lisi në fshatin Karbunicë.
“Më 03.02.2021, rreth orës 10, nëpunës policor dhe përfaqësues të policisë pyjore në Kërçovë, në zonën e fshatit kërçovar Karbunicë, gjatë prerjes ilegale të drurëve, i ka kapur F.A.(38), S.M.(34) dhe E.M.(28), të gjithë nga Kërçova të cilët, me vetura, në mënyrë të paautorizuar kanë prerë 16 kërcell lisi. Ata janë arrestuar dhe u janë marrë automjetet. Kundër tyre, do të parashtrohen masa adekuate”, thuhet në njoftimin e MPB-së.
Për prerjen ilegaleve të drurëve ka raportuar edhe TV21, madje është mësuar se tashmë ishin ngritur edhe padi penale ndaj disa personave.
Prerja ilegale e drurëve e ka dëmtuar për 300 mijë euro Ndërmarrjen Publike “Llapushnik” në Kërçovë, problem i cili ishte përmendur edhe në raportin e “Eurothink”. Në këtë raport, thuhet se në dëmin ndaj Ndërmarrjes, janë të përfshirë edhe udhëheqësit dhe punëtorë të ndërmarrjes./TV21