Nuk është e pazakonshme që protestuesit të gjuajnë me sende të ndryshme në drejtim të policisë në protesta, por është e rrallë që policia t’ua kthejë në të njëjtën formë.
Kjo ndodhi dje në protestën që u organizua si shenjë revolte për rastet e montuara gjyqësore. Policët gjuanin drejt protestuesve gjësendet që protestuesit paraprakisht i kishin hedhur në drejtim të policëve.
Kamera e TV21 regjistroi momentin kur një polic gjuan kah protestuesit.
Ky si duket motivoi kolegun që kishte prapa, i cili nuk gjuajti vetëm një herë, por pesë herë.
Skena të këtilla kapën edhe kamerat e mediave të tjera.
Veç kësaj, u kap edhe një skenë kur polici pengon me këmbë një qytetar, i cili u rrëzua.
Ministria e Brendshme thonë se asnjë protestues nuk është lënduar, ndërsa veprimet joprofesionale të policëve do shqyrtohen.
“Deri më tani nuk kemi marrë paraqitje për protestues të lënduar, ndërsa për çfarëdolloj procedimi joprofesionale nga ana e zyrtarëve policorë, rasti do të shqyrtohet dhe për këtë do të informoheni”, thonë për TV21 nga MPB-ja.
Protesta në formë mardhi në fillim ishte e qetë, por konfrontimi ndodhi pasi një kordon policor ua ndërpreu udhën protestuesve të cilët ishin nisur drejt gjykatës penale, e më pas qeverisë, për të ngritur zërin ndaj rasteve, siç i quajnë, të montuara dhe të padrejta gjyqësore, si MonstRa, Alfa e Almiri. MPB me arsyetim:
“Për shkak të arsyeve të sigurisë u vendos që turma të ndalet në atë pikë, e nëse përfaqësues të protestuese dëshironin të dërgojnë ndonjë mesazh drejt Kuvendit apo Qeverisë, kanë mundur të lëvizin lirshëm”, shtojnë nga MPB.
Nga Ministria e Brendshme tregojnë se dje 7 policë janë lënduar, ndërsa më pas edhe 4 të tjerë kanë paraqitur lëndime trupore. Bëhet fjalë për lëndime të lehta ndërsa pas kontrollit mjekësor policët janë lëshuar në mjekim shtëpiak, informojnë nga MPV.
Janë arrestuar 8 protestues, të cilëve në bazë të udhëzimeve të Prokurorisë, do t’u ngritet padi penale për pjesëmarrje në turmë që do të kryejë vepër penale”, sipas nenit 385 të Kodit Penal. Nga policia po ashtu thonë se Sektori për Punë të Brendshme Shkup ka marrë masa për identifikim edhe të personave të tjerë.