Përveç gjobave, për protestën e “Monstrës” do të ketë edhe kallëzime penale, paralajmëroi Spasovski

Përveç gjobave, për organizatorin dhe disa pjesëtarë të protestës për rastin “Monstra”, do të ketë edhe kallëzime penale, njoftoi në konferencën për media, ministri i Punëve të Brendshme, Oliver Spasovski.

Kallëzimet penale janë për mosrespektim të protokolleve për mbrojtje nga Covid-19 dhe për dëmtim të pronës shtetërore dhe të veturave të policisë.

“Protestat të cilat mbahen, janë e drejtë demokratike për të shprehur pakënaqësinë, por, asnjëherë nëpërmjet tyre nuk duhet të shkelen ligjet dhe rregulloret. Është e vërtetë se është parashtruar denoncim edhe për organizatorin e protestës, pasi para se gjithash nuk u janë përmbajtur masave për mbrojtje të shëndetit dhe nuk janë respektuar as protokollet. Megjithatë, do të ketë kallëzime penale edhe për pjesëtarët e protestës, të cilën kanë dëmtuar pronën shtetërore, kanë dëmtuar veturat e Ministrisë së Punëve të Brendshme”, tha Spasovski, njofton TV21.

Në lidhje me protestën në fjalë, ai njoftoi se deri dje janë identifikuar 14 persona për dhunë ndaj objekteve shtetërore gjatë protestës.

Përndryshe, organizatori i protestës ishte dënuar edhe me 510 euro gjobë, për protestën që u mbajt më 29 janar, ku u shpreh pakënaqësi ndaj fjalëve përfundimtare të prokurores Fatime Fetai për rastin gjyqësor “Monstra”./TV21