Përplasje, akuza dhe polemika të ashpra – kështu nisi seanca e sotme parlamentare, në të cilën deputetët e partive opozitare shqiptare reaguan ndaj caktimit të seancës. Ata e sulmuan kryetarin e Kuvendit, Afrim Gashi, për shkak se ka caktuar tri seanca në një afat shumë të shkurtër, si dhe sepse në njërin prej ligjeve që është në rend dite, Gashi ka nënshkruar versionin në gjuhën maqedonase, por jo edhe atë në gjuhën shqipe.
“Rendi i ditës së bashku me të gjitha materialet duhet t’u dorëzohet deputetëve së paku 10 ditë pune para mbajtjes së seancës. Gjithashtu, sipas paragrafëve 2 dhe 3 të të njëjtit nen, në rast të procedurës urgjente, urgjenca duhet të arsyetohet me shkrim, ndërsa këtë nuk e kemi”, u shpreh Rina Ajdari – BDI.
“Nuk do t’ju falim, zoti Afrim Gashi, që në këtë mënyrë i dorëzoni ligjet dhe nënshkrimi qëndron vetëm në versionin maqedonisht, ndërsa në versionin shqip nuk ka as numër arkivor e as nënshkrim. Nëse keni vendosur kështu, unë them se vetë duhet të përmirësoheni, vetë duhet të përmirësoheni. Kam thënë se komunikimi institucional ndërmjet Kuvendit dhe Qeverisë duhet të jetë në dy gjuhë”, theksoi Ilire Dauti nga Lidhja Shqiptare.
Kryetari i Kuvendit, Afrim Gashi, u tha se po e keqpërdorin mundësinë për vërejtje procedurale me qëllim që ta bllokojnë seancën, ndërsa Rregullorja e Punës nuk është shkelur fare.
“Të gjitha këto improvizime që po i bëni, duke dashur që me procedurë ta bllokoni këtë seancë, nuk do t’ia dilni, sepse po ju them se kjo është hera e fundit që flisni dy herë për të njëjtën çështje. Nuk do t’i lejoj asnjë deputeti të marrë fjalën për procedurë për të njëjtën çështje”, theksoi Afrim Gashi, kryetar i Kuvendit.
Për këtë reagoi Halil Snopçe nga Aleanca për Shqiptarët.
“Kështu nuk mund të thoni. Do ta lejoni procedurën ashtu siç është e shkruar, jo ashtu siç juve ju përshtatet. Këtë nuk mund ta komentoni sipas dëshirës suaj. Turp për ju, Afrim Gashi, jo për shkak meje. Nuk thirret seancë në këtë mënyrë siç po veproni. Këtu po bëni korrupsion bashkë me ligjet për arsimin, për cilësinë e arsimit. Me lejen e kujt u thirr kjo seancë? Ky është korrupsion në Kuvend. Kështu doni të vazhdoni? Atëherë, punë të mbarë ju qoftë”, theksoi Halil Snopçe, Aleanca për Shqiptarët.
Ndërkaq, Adnan Azizi akuzoi se opozita bën cirk kur nuk ka çfarë të propozojë.
“Këtu po bëhet një lojë si në cirk dhe, për fat të keq, opozita nuk ka asnjë kauzë, nuk ka çfarë të flasë, nuk ka argumente dhe krijoi një kauzë për bllokimin e Kuvendit pa asnjë arsye”, tha Adnan Azizi – VLEN.
Për ta qetësuar situatën, Afrim Gashi dha pauzë dhe i thirri koordinatorët në një takim të jashtëzakonshëm. Pas pauzës, seanca vazhdoi.