Prokurorët Zorica Pavlloviq dhe Dejan Petreski nga Prokuroria e Shkupit kanë kërkuar nga Gjykata e Tetovës që të mos pranojë si dëshmi ekspertin nga forenzika Gjermane lidhur me shkaqet e zjarrit të spitalit modular në Tetovë. Sipas audio inçizimit nga seanca gjyqësore, prokurorët konsiderojnë se qëllimi i mbrojtjes me këto dëshmi, është vetëm që të zvarritet procedura penale. Nga Gjykata vendosën ta refuzojnë kërkesën e mbrojtjes, me arsyetim se ka mjaftë dëshmi për zjarrin, dhe në fakt nuk diskutohet për atë se çfarë e shkaktoi zjarrin.
“Gjykata solli vendim, propozimi i mbrojtjes për dëgjim të personit nga forenzika e Republikës së Gjermanisë, refuzohet duke patur parasysh se ekzistojnë mjaftë dëshmi lidhur me zjarrin e shkaktuar. Konstatimi i tillë është i parëndësishëm për aktakuzën. Do ta përsëris edhe njëherë se nuk është lëndë e akuzës pse ka shpërthyer zjarr. Disa herë e kam përsëritur edhe më parë, edhe më parë, ja edhe sot, po futemi në diçka që nuk është përmbajtje e akuzës”, thuhet në video incizim nga seanca gjyqësore.
Sipas IRL-së, Prokuroria dhe Gjykata kanë refuzuar edhe ekspertizën e përgatitur nga forenzika gjermane. Por këtë e demantojnë nga Prokuroria Themelore Publike. Siç thonë nga atje, rezultatet nga ekspertiza gjermane vazhdimisht kanë qenë pjesë përbërëse e materialit dëshmues.
“Inçizimi padyshim dëshmon se për Prokurorinë, konstatimi nga kriminalistët gjermanë ka qenë dëshmi e rëndësishme të cilën prokurorët e kanë propozuar dhe e kanë paraqitur në procedurë para gjykatës. Gjatë diskutimit kryesor, mbrojtja dha propozim, që përskaj ekspertizës me shkrim, personalisht të dëgjohet edhe personi nga forenzika e Gjermanisë, i cili ka përgatitur konstatim me shkrim – dëshmi në procedurë”, deklarojnë nga Prokuroria Publike.
E sipas konstatimit të ekspertit gjerman, thuhet se zjarri është shkaktuar në dhomën 3, te pjesa e krevatit numër 1 ku mjekët kanë qenë duke reanimuar një paciente me defibrilator. Për arsyet pse aq shpejtë është shpërndarë zjarri, ai ka shënuar se objekti ka patur material të dobët izolues, mënyrë e dobët e ndërtimit si dhe koncentrim të lartë të oksigjenit.
Përndryshe familjarët e 14 viktimave nga kjo tragjedi, së bashku me qytetarë tjerë nga Tetova, para Gjykatës Themelore kërkuan shkarkimin e kryeprokurorit Joveski si dhe i njëjti të përgjigjet penalisht.