Përmbytjet në Batincë, banorët përballen me pasojat!

Rreth 20 metra shtëpinë e kanë larg nga lumi.
Deri në ora 4 të mëngjesit e kanë pastruar ujin nga oborri, ndersa një pjesë depërtoi edhe në banjo.

“Jemi këtu në Batincë tek një familje 4 anëtarëshe, siç mund të shihet oborri është i stërmbushur me baltë, ata tregojnë se komshinjtë u kanë ndihmuar me pompa nga vërshimet e mbrëmshme. Se deri ku ka qenë e mbushur me ujë mund të shihet dukshëm tek muri, pra nga ana tjetër shihet edhe balta të cilët i kanë mbushur thasët për ta larguar”, raporton gazetarja e TV21, Fazile Halili.

Një banor tregon se shtëpia nuk ka shumë dëme, ndërsa tek shupa ku djali i saj i ka mbajtur mjetet e punës për ndërtimtari, të gjitha janë prishur.

“Kemi ardhur në një shtëpi tjetër këtu në Batincë. Një familje 10 anëtaresh ankohet nga vërshimet që kanë ndodhur mbrëmë, siç na tregoi prapa kamerës gjysma e oborrit është shembur dhe ka rënë më poshtë”, raporton gazetarja e TV21, Fazile Halili.

Zonja e kësaj shtëpie Natasha Mustafovska për TV21 tregon se hapësira e cila është shembur aty e kanë pasur kuzhinën, ndërsa tani thotë se nuk kanë kushte për jetesë sepse gypat e ujit kanë plasur dhe stufa elektrike ka rënë poshtë.

Ndryshe reshjet e mëdha të shiut shkaktuan daljen nga shtrati të lumit Markova me cka shumë bodrume janë përmbytur. Situata sot është më e qetë, lumi është kthyer shtratin e vet dhe rrugët janë të kalueshme.
Në terren sot kanë qenë ekipet e Drejtorisë për Mbrojtje dhe Shpëtim të cilët kanë ndërhyrë me pompa për të nxjerrë ujin.

Nga Instituti Hidrometeorologjik paralajmërojnë se niveli i ujërave në lumenjtë e vendit është rritur dhe reshjet e shiut do të vazhdojnë gjatë gjithë javës.