Kim Kardashian është ndarë ligjërisht nga Kanye West. Vendimin e dha dje gjykatësi i Gjykatës së Lartë të Los Angeles, Steve Cochran. Si rezultat i këtij vendimi, Kim është zyrtarisht beqare dhe nuk do të jetë më “Kim Kardashian West”.
Kardashian u shfaq në seancë përmes video-konferencës dhe dukej e lumtur pavarësisht çështjes së vështirë. Gjatë seancës, gjyqtari i bëri Kardashian disa pyetje nën betim. Kur u pyet nëse donte ta ndryshonte përsëri mbiemrin e saj, ajo pohoi.
“Pasi gjyqtari lexoi pyetjet dhe i tha asaj se tani e ka kthyer statusin e saj beqare, Kim buzëqeshi,” tha një burim i brendshëm për Page Six.
Avokatja e re e West, Samantha Spector – të cilën ai e punësoi në minutën e fundit pasi pushoi avokatin e tij të mëparshëm brenda më pak se 24 orëve nga seanca dëgjimore – tha se klienti i saj nuk kishte “asnjë problem” me Kardashian që t’i kthente mbiemrin e saj, por ishte më i shqetësuar për “asetet dhe interesat.” Spector tha në emër të West se reperi donte “të sigurohej që besimi i tij të mbrohej”.
Më vonë gjatë seancës, gjyqtari pyeti se kur të dyja palët do të dëshironin të ktheheshin për të diskutuar çështje të tjera. Spector kërkoi 120 ditë, duke thënë se ajo e di se “ka shumë çështje të kujdestarisë që duhet të zgjidhen”. Gjykatësi e pranoi dhe të dyja palët do të kthehen për një seancë dëgjimore më 5 gusht.
Kardashian për herë të parë paraqiti një kërkesë për t’u bërë ligjërisht beqare në dhjetor 2021, pasi paraqiti kërkesën për divorc nga West në shkurt 2021, pas gati shtatë vitesh martesë. Ish-çifti kanë bashkë katër fëmijë: North, 8 vjeçe, Saint, 6, Chicago, 4 dhe Psalm, 2 vjeç.
