Gjithsej 4.635 kontrolle dhe mbikëqyrje kanë kryer gjashtë shërbimet inspektuese në periudhën nga 30 nëntori deri më 6 dhjetor të këtij viti. Inspektuesit nga Inspektorati shtetëror i tregut (ISHT) kanë kryer gjithsej 3.129 kontrolle dhe 490 mbikëqyrje të jashtëzakonshme inspektuese, nga të cilat numri më i madh janë të lidhura me respektimin e protokolleve për hapje dhe punë të objekteve hotelierike dhe kafeneve.
Siç kumtoi në konferencën e sotme për shtyp, kryetarja e Këshillit inspektues, Magdalena Filipovska Grashkoska, në bazë të kontrolleve të kryera në lloje të ndryshme të subjekteve nga ana e inspektorëve të tregut janë shqiptuar 30 kundërvajtje dhe nga 44 vendime dhe urdhër pagesa kundërvajtëse në bazë të ligjeve materiale sipas të cilave vepron ky inspektorat.
Inspektorati shtetëror i punës, siç tha, gjatë javës së kaluar ka realizuar 489 mbikëqyrje tek punëdhënësit me ç’rast janë sjell 18 vendime për parregullsi të konstatuara nga sfera e marrëdhënieve të punës. Lidhur me Ligjin për mbrojtje të popullatës nga sëmundjet infektive në pesë raste janë konstatuar kundërvajtje minimale të protokollit për masa parandaluese për të gjitha vendet e punës për çka inspektorët kanë shqiptuar masë përkatëse – paralajmërim.
Agjencia për ilaçe, megjithatë në periudhën prej shtatë ditësh ka kryer 25 mbikëqyrje në lidhje me kontrollimin e të dhënave për çmimet e vendosura të produkteve për mbrojtjen e koronavirusit dhe nuk janë gjetur parregullsi specifike.
Agjencia për ushqim dhe veterinari në periudhën e njëjtë ka zbatuar 318 inspektime në shumë qytete nëpër shtet, në markete, objekte hotelierike, mishtore dhe objekte të prodhimit, në bazë të Ligjit për mbrojtjen e popullsisë nga sëmundjet Infektive dhe Ligjin për sigurinë e ushqimit.