Për rrugën drejt BE do të flitet me Koshtën! Filipçe akuzoi për autokraci, Mickoski thotë se ka liri më të madhe

Ende nuk ka përgjigje nga autoritetet bullgare nëse do të realizohet takim dypalësh për kontestin dhe integrimin europian, në margjinat e Samitit të NATO-s në Hagë, në fund të këtij muaji. Kryeministri Hristijan Mickoski akuzoi se Bullgaria po e përdor anëtarësimin në Bashkimin Europian si armë.

“Planifikoj këto ditë të flas personalisht me kryetarin e Këshillit Europian, zotin Koshta, sepse ishte ideja e tij dhe ne e pranuam pa asnjë rezervë. Menjëherë thamë “nuk ka asnjë problem”. A ka ndonjë përgjigje nga pala tjetër?”, tha Mickoski.

Nga ana tjetër, kryetari i LSDM-së, Venko Filipçe, vlerësoi se kryeministri po udhëheq Qeveri autoritare. Ai këtë e tha në Athinë, në prani të ish-kryeministrave Zoran Zaev dhe Aleksis Cipras, duke folur për përfitimet e Marrëveshjes së Prespës.

“Marrëveshja e Prespës zgjodhi kontest shumëdekadësh mes RMV-së dhe Greqisë dhe mundësoi që Maqedonia e Veriut të bëhet anëtare e NATO-s, por për fat të keq nuk jemi anëtare e BE-së, edhe pse ende ekziston dëshira. Momentalisht kemi Qeveri autoritare të djathtë në vendin tonë që nuk dëshiron ta lëvizë vendi përpara, kjo është si vaksinë, e morëm dozën e parë me NATO-n, por nuk e morëm dozën e dytë”, tha Filipçe.

Kryeministri nuk e ka të qartë në bazë të cilave kritere Filipçe del me konkluzion të tillë.

“Nuk e di çfarë i ka shkaktuar ndjenjë të tillë. Unë përkundrazi mendoj nuk ka ekzistuar liri më e madhe në shoqëri sesa gjatë këtij viti që është edhe në media”, dekalroi Mickoski.

Përveç LSDM-së, paraprakisht edhe nga BDI akuzuan se pushteti ka agjendë antieuropiane, e ndalon procesin e integrimit europian, duke e vendosur Maqedoninë nën ndikimin e autokracive lindore.