Kosova për herë të parë në histori do të ketë Kodin Civil, i cili do të bëhet në pajtim me legjislacionin e Bashkimit Evropian dhe praktikat më të mira evropiane dhe ndërkombëtare si parakusht edhe për zhvillim ekonomik të Kosovës.
Kjo do të mundësonte rregullimin e raporteve të ndryshme juridiko civile me dispozita që njëkohësisht janë funksionale dhe të qëndrueshme për vendin.
Këto konkluzione u dhanë gjatë takimit të Komisionit për hartimin e Kodit Civil të Republikës së Kosovës.
Ministri i Drejtësisë Hajredin Kuçi, në cilësinë e kryesuesit të këtij komisioni, ka thënë se puna në finalizimin e Kodit Civil, është vepra më kapitale për Qeverinë, Ministrinë e Drejtësisë dhe për sistemin e të drejtës civile në përgjithësi.
Ai theksoi mbështetjen e plotë të Ministrisë së Drejtësisë dhe të Qeverisë për punën e Komisionit për hartimin e Kodit Civil të Republikës së Kosovës.
Në vijim të takimit, kryesuesit e grupeve punuese prezantuan konkluzionet dhe rekomandimet kryesore të nxjerra nga takimet e mbajtura më parë ku janë diskutuar raportet e vlerësimit të hartuara nga Projekti “Mbështetje Kodit Civil dhe të Drejtave Pronësore”.