“Vjedhje antologjike” e cilësoi kryetari i LSDM-së, Venko Filipçe, marrëveshjen me Mbretërinë e Bashkuar për investimet në projekte në vlerë prej 6 miliardë euro. Para simpatizantëve në Shtip, Filipçe zbuloi se delegacioni i udhëhequr nga zëvendëskryeministri Aleksandar Nikolloski në Londër tashmë është takuar me kompanitë që do të angazhohen për realizimin e projekteve, gjë që sipas tij bie ndesh me njoftimet e qeverisë dhe me ligjet.
“Menjëherë pas nënshkrimit, janë takuar në Londër me kompanitë që do të jenë realizuese të projekteve… çfarë tenderi, çfarë Ligji për prokurime publike?! Të gjitha janë gënjeshtra të mëdha. I kanë vënë në borxh gjeneratat e ardhshme. Bëmë llogari – çdo foshnje që do të lindë në 25 vitet e ardhshme, në ditën e lindjes do të ketë borxh prej gjashtë mijë eurove”, tha Venko Filipçe.
Nga VMRO-DPMNE reaguan duke thënë se vjedhje ishte blerja e vaksinave kineze me çmim të dyfishuara, si dhe ndërtimi i spitalit modular në Tetovë.
“Ajo që nuk është vjedhje është kur nënshkruan pakt me shtetin më të fuqishëm në botë dhe nuk shet as emrin, as Kushtetutën e as identitetin. Nuk është vjedhje kur nga një partneritet i tillë përfiton fonde për hekurudha të reja, për spitale, për arsim… diçka që është e mirë si për maqedonasit, ashtu edhe për shqiptarët”, deklaroi Valentin Manasievski.
Edhe pse ende nuk është bërë publike norma e interesit për mjetet që do të tërhiqen, në një intervistë, ambasadori britanik, Methju Louson, konfirmoi se një nga kushtet e marrëveshjes është që të paktën 20% e kompanive pjesëmarrëse në projektet e financuara të jenë nga Britania, në cilëndo fazë të procesit. Zëvendëskryeministri Nikolloski në një intervistë theksoi se do të respektohet Ligji për prokurime publike dhe se pret që Kuvendi të ratifikojë marrëveshjen brenda dy javëve ndërsa në vjeshtë të fillojnë punët ndërtimore për hekurudhën dhe institucionet shëndetësore, me vlerë deri në 2.2 miliardë euro.