Për disa orë shpenzohen 2.000 doza të vaksinës! “Vaksina kundër gripit mbron vetëm nga gripi sezonal”

Që nga dita e parë qytetarët treguan interes tejet të madh për t’u vaksinuar kundër gripit sezonal. Në Qendrën për Shëndet Publik “Prolet”, për disa orë janë shpenzuar 2.000 dozat e para të vaksinës me blerje private që kushton 800 denarë. Prej atje thonë se brenda dy javëve do të arrijnë doza të reja.

“Dje filluam t’i vaksinojmë njerëzit dhe brenda disa orëve u shpenzuan vaksinat. Kërkesa ishte e madhe, shumë kompani i vaksinuan të punësuarit e tyre. Më shumë doza u janë dhënë kompanive më të mëdha, të cilat paraprakisht janë paraqitur dhe kanë caktuar termin për vaksinim”, u shpreh Lulje Imeri – epidemiologe në Qendrën për Shëndet Publik.  

Dr.Imeri thotë se edhe pse vaksina kundër gripit sezonal nuk prodhon antitrupa për koronavirus, megjithatë ajo kontribuon për përmirësimin e imunitetit dhe i mundëson organizmit që më lehtë të luftojë kundër infeksionit, por kjo nuk do të thotë se mbron nga koronavirusi.

 “Ndoshta ka konfuzion, sepse kemi pandemi… Ndoshta dikush po mendon se vaksina mbron nga diçka tjetër, por fatkeqësisht duhet të shpjegojmë se vaksina kundër gripit mbron vetëm nga gripi sezonal. Domethënë, imuniteti duhet të jetë në nivel të lartë që vaksina të mund t’ju mbrojë vetëm nga gripi sezonal”, theksoi Luljeta Imeri – epidemiologe në Qendrën për Shëndet Publik.  

Nga Ministria e Shëndetësisë kumtuan se deri më tani të gjitha terminet për vaksinimin falas kundër gripit sezonal për këtë javë janë të mbushura përmes mjekëve amë dhe sistemit “Termini im” në të gjitha pikat vaksinimi në Shkup. Ndryshe, ky është viti i tretë që sigurohet vaksinim pa pagesë për kategoritë e rrezikuara të qytetarëve mbi 65 vjet, gratë shtatzëna, nëpunësit shëndetësor dhe fëmijë deri në 5 vjet. Ministria e Shëndetësisë ka siguruar 40 mijë doza të vaksinës.