Pengohet projekti i financuar nga BE-ja! Bujku detyrohet ta kthejë grantin prej 74 mijë eurove

Mori 74 mijë euro grant nga Bashkimi Evropian, por të njëjtat në dhjetor u detyrua t’i kthejë për shkak të pengesave që ju krijuan nga keqfunksionimi i institucioneve shtetërore.

Dragi Pakumov, bujk që drejton edhe kooperativën “Vegefresh” në Kuklish të Strumicës, bashkë me 20 bujq të tjerë dështuan për ta ndërtuar një qendër blerëse-distrubuuese për prodhimet bujqësore, e kjo për shkak të mosdefinimit të qartë nëse toka ku donin të ndërtonin është tokë bujqësore apo zonë industriale.

Duke u bazuar në dokument që Komuna i kishte dhënë në 2016-tën se toka është jashtë zonës së ndërtimit, Pamukov aplikon me projekt në Ministrinë e Bujqësisë.

Dragi Pamukov: “E dorëzova deri tek Ministria e Bujqësisë për miratim për ndërtim dhe Ministria më thotë ky dokument është i vjetër, na sillni tjetër nga vetëqeverisja lokale. Shkoj në vetëqeverisjen lokale më 17.01.2020 ma japin: Vendim nr.07/184/1 nga viti 03.04.2000, flasim për 20 vjet”!

TV21: Dhe se?

Dragi Pamukov: “Se vendi, ky këtu, gjendet në zonë ndërtimi. Unë me të vërtetë nuk mund të kuptoj”.

TV21: D.m.th tani nga vetëqeverisja lokale ju thonë se…

Dragi Pamukov: “Se është në zonë ndërtimi”.

TV21: Për dallim nga kjo tjetra ku shkruhet se toka është jashtë zonës për ndërtim.

Dragi Pamukov: “Po por ky është vendim që në vitin 2000, deri në 2016-tën pse nuk është zbatuar? 16 vjet në kadastër nuk është zbatuar. Ja dëshmi”.

Institucionet përkatëse konfirmojnë këtë lëmsh nëpër të cilin Pamukovit i është dashur të kalojë.

Ministria e Bujqësisë, nga e cila “Vegefresh” tokën e ka marrë hua për 30 vjet me qëllim ndërtimin e qendrës grumbulluese, thonë se “objekti nuk është ndërtuar sepse nuk ka marrë leje për ndërtim, për arsye se nga viti 2000 Komuna e Strumicës ka sjellë vendim për zgjerim të zonës industriale, kurse parcela ndodhet në atë zonë”.

Komuna e Strumicës konfirmon. Thonë se “toka gjendet në zonë ndërtimi në vendin Kuklish, në përputhje me Planin e Përgjithshëm Urbanistik – Vendim nr. 07-184/1 të viti 2000”.

Nga Kadastra thonë se ky vendim i komunës “Vendimi i Komunës nuk është dorëzuar në Sektorin për Kadastrës të patundshmërive Strumicë, andaj nuk janë bërë ndryshime të tjera në lidhje me parcelën në fjalë”.

TV21 e provoi online dhe parcela vazhdon të figurojë si tokë bujqësore, për dallim nga vendimi i komunës në vitin 2000 ku është paraparë zgjerim i zonës industriale.

Kështu, pas disa përpjekjesh derë më derë të institucioneve, Pamukov u dorëzua, duke lënë që i gjithë projekti të bjerë në ujë.  “Ky është një lëmsh që nuk mund të zgjidhet asnjëherë. Dhe kur pëson?! Pëson bujku, sektori i biznesit, pëson edhe shteti të cilit nga Bashkimi Evropian do t’i thonë keni aq e kaq mjete të papërdorura dhe gjithnjë do të jemi në listën e zezë të mjeteve të papërdorura. Këtu tek ne është problemi, tek institucionet. Nuk po flas për 3 vitet e fundit, por për 20 vitet e fundit. Të mos mundeni një vendim, një zonë industriale të bëni, turp, ja zona industriale, shiheni lirisht, a ka ndonjë fabrikë?!”, deklaroi Dragi Pamukov – bujk, kooperativa Vegefresh.