Pendarovski e mori funksionin e Makronit dhe vend i hyri në pasiguri juridike, vlerëson profesori Shasivari

TË FUNDIT

Dhënia e mandatit pa sigurim të shumicës parlamentare dhe pa funksionalizim të Kuvendit të Maqedonisë së Veriut, për profesorin universitar të juridikut, Jeton Shasivari është një rast precedent që po ndodh për herë të parë në historinë demokratike dhe parlamentare të Maqedonisë së Veriut.

“Dje, me besimin e mandatit u instalua edhe një precedent i ri politik, pra për herë të parë në historinë parlamentare të shtetit tonë e besoi mandatin për formim të qeverisë pa pasur paraprakisht asnjë shkresë”, deklaroi Shasivari.

Me këtë veprim, sipas profesorit presidenti i shtetit, Stevo Pendarovski po merr funksionin kushtetues që e ka vetëm presidenti i Francës, Emanuel Makron. Për shkak se Kushtetuta jonë është krejt ndryshe nga ajo e Francës, profesori vlerëson se vendi po hynë në një pasiguri juridike.

“Këtë funksion kushtetues për të emëruar kryeministrin pa asnjë detyrim që për këtë gjë t’i konsultojë të gjitha partitë parlamentare, e ka presidenti francez, Emanuel Makron në një model krejt tjetër të organizimit të Kushtetutës i cili është esencialisht i ndryshëm nga sistemi dhe modeli ynë i Kushtetutës i organizimit të pushtetit qendror. Prandaj po e them, se prej dje ne si shtet kemi hyrë në një situatë pasigurie juridike lidhur me konstituimin e sistemit të ri politik pas zgjedhjeve”, sqaron profesori Jeton Shasivari.

Dilema sheh edhe në kombinimin që u bënë mes dy neneve të Kushtetutës, nenit 84 paragrafi 1 alinea 1 ku thuhet se kryetari i Republikës cakton mandatarin për formimin e Qeverisë me nenin tjetër 90, paragrafi 1 ku si kusht kërkohet që kandidati për mandatar para pranimit të mandatit, të ketë siguruar shumicën parlamentare prej së paku 61 deputetë në parlament.

Por, Pendarovski ishte i bindur se nuk po bën precedent, pasi sipas tij në arkivën e presidencës askush nuk ka dorëzuar dëshmi se ka siguruar shumicë në Kuvend për t’iu dhënë mandati. I vetmi rast, siç tha Pendarovski kur është dhënë dëshmi për sigurim të 61 deputetëve ka qenë pas zgjedhjeve të 2016-s, kur ish-presidenti Gjorge Ivanov refuzonte ta mandatonte liderin e LSDM-së, Zoran Zaev si parti e dytë për numrin e sigurimin  shumicës.