Qeveria nesër në mesditë do të vendosë për shkarkimin e drejtorit të Inspektoratit të Tregut, Stojko Paunovski, i cili nuk respekton ligjin për shpërndarje të të punësuarve me programin K5.
“Nuk do të lejojmë asgjë tjetër përveç veprimit sipas rregullave ligjore. Edhe një herë them, bëhet fjalë për zyrtar të mirë publik, shok imi i mirë, nuk do të lejoj inate me shefat, nuk do të lejojë moszabtim të ligjeve, kjo edhe më e rëndësishme…”, deklaroi Zoran Zaev – kryeministër i Maqedonisë së Veriut.
Po para seancës qeveritare, kryeministri Zoran Zaev tregon se në orën 9 do të takohet me inspektorët e inspektoratit të tregut që përmes peticionit kundërshtojnë shkarkimin e shefit të tyre. Nuk është i qartë nëse pas këtij takimi do të mbetet në qëndrimin për shkarkim ose jo të Paunovskit.
Zoran Zaev: “Nesër në seancën e Qeverisë gjithsesi se do ta konfirmoj atë që e kam deklaruar në publik”.
TV21: Sa është e mundur që ky takim t’ua ndërrojë mendjen për vendimin tuaj?
Zoran Zaev: “Është me vlerë që të shihen të gjitha argumentet për një procedurë. Të gjithë e dimë se në vendin tonë duam rend, shpesh kam pranuar kritika dhe kam ditur të përmirësohem kur nuk kam qenë i qëndrueshëm në përcaktime, por njëkohësisht edhe kam ditur të mësoj kur duhet të jem tolerant ose jo, andaj japim çdo mundësi t’i dëgjojmë të gjithë që kanë për të thënë para sjelljen së vendimit final”.
A ka shanse që nesër inspektorët ta ndryshojnë qëndrimin tuaj dhe të mos e ndryshoni Stojko Paunovskin nga posti drejtorit?
Zoran Zaev: “Gjithsesi se mbetet mundësi e hapur, prandaj edhe kam caktuar takim me inspektorët e Inspektoratit të Tregut, që t’i dëgjoj edhe argumente e tyre”.
Kur të merret vendimi, Zaev thotë se do të tregojë se në përputhje me cilin ligj dhe rregull është vendosur. Sot citoi disa nene të ligjit për transferim të administratorëve, mes të cilëve edhe nenin 5, të cilin nuk e respekton Paunovski.
Ligji i transferit të nëpunësve administrativë të punësuar nëpërmjet programit K-5 në Ministrinë e Sistemit Politik dhe Marrëdhënieve Ndërmjet Bashkësive – Neni 5
-Personat udhëheqës në institucionet sipas nenit 1 të këtij ligji, janë të detyruar ta fillojnë procedurën e harmonizimit të akteve për sistematizim në vendet e punës me dispozitat e këtij ligji në afat prej 30 ditësh nga miratimi i Planit të marrjes sipas nenit 4 të këtij ligji.
I njëjti ligj, në nenin 7, po ashtu parasheh gjobë 2000 europersonit përgjegjës në institucionin nëse nuk i harmonizojnë aktet për organizim të brendshëm dhe aktet për sistematizim të vendeve të punës në pajtim me nenin 5 të këtij ligji. I pyetur nëse edhe për Paunovskin do të ketë gjobë të tillë, kryeministri shkurt u përgjigje se Qeveria do të veprojë sipas ligjit dhe kodit etik. Ai gjatë përgjigjeve në këtë temë po ashtu tregoi se Paunovski ka qenë i informuar për veprimet e tij, me shkrim dhe me gojë, por nuk ka kërkuar takime për qartësime.