“Pasaportë Covidi”, po të pavaksinuarit? Krerët e Bashkimit Evropian nuk nguten me vendimin

Propozimi i Kryeministrit grek Kirijakos Micotakis për “Pasaportë Kovidi” gjatë udhëtimeve në kuadër të BE-së, javën që vjen pritet të debatohet mes krerëve të vendeve të Bashkimit Evropian.

Jo të gjitha vendet po e shohin me sy të mirë këtë ide. Shqetësimet janë theksuar edhe në takimin e fundit të ministrave të shëndetësisë të BE, ku disa nga kryeqytetet kryesore, përfshirë Berlinin, janë të kujdesshëm ndaj çdo diskriminimi mes atyre që kishin fat për ta marrë vaksinën dhe pjesës tjetër.

Kryetarja e Komisionit Evropian, Ursula von Der Lajen, e ka përshëndetur nismën e kryeministrit grek, duke shtuar se këto certifikata duhet të pranohen dhe standardizohen në mënyrë të ndërsjelltë.

 “Mendoj se është e rëndësishme që gjithnjë të gjendet balanci i duhur. Për shembull gjithnjë mund të kombinoni, për të pasur certifikatën e vaksinimit ose test negativ COVID, nëse nuk ke pasur qasje në vaksinim. Ka mundësi të gjendet balanc fer dhe të barabartë për ata që kanë certifikatë, që janë vaksinuar, dhe atyre që nuk kanë”, tha Ursula Von Der Lajen – Kryetare e Komisionit Evropian.

Komiteti i OBSH-së për Situata Emergjente ka rekomanduar që për shkak të variantit të ri të koronavirusit, të vazhdojë “situata emergjente globale” dhe të mos vendoset kushti për “pasaportë vaksine” në udhëtimet ndërkombëtare.

 “Në këtë moment mos vendosni detyrim për dëshmi për vaksinim ose imunitet për udhëtim ndërkombëtar, sepse ende ka informacione të panjohura për efikasitetin e vaksinave në uljen e transmisionit, ndërsa vaksinat nuk janë plotësisht të kapshme”, thonë nga Komiteti i OBSH-së.

Ditë më parë, Ministri i Shëndetësisë Venko Filipçe tha se “pasaporta e vaksinimit” është temë për të cilën flasin me përfaqësuesit e OBSH-së në vend, duke konsideruar se duhet të jetë një dokument i unifikuar.

 “Gjithsesi se çdo i vaksinuar do të marrë vërtetimin e duhur megjithatë punojnë që të merret ndonjë formë, qoftë elektronike ose në letër, një lloj forme-pasaporte se personi e ka marrë vaksinën. Ka shumë gjasa se do të kërkohet në shumë vende të tjera, andaj kjo është diçka që në shumë vende të kyçura në kuadër të OBSH-së dhe me shumë gjasa do të ketë edhe formë të tillë të vërtetimit, ndonjë lloj forme të pasaportës”, theksoi Venko Filipçe – Ministër i Shëndetësisë.

Vendosja e detyrimit për “pasaportë kovidi”, do të kufizonte lirinë e lëvizjes së shumë qytetarëve anëekënd botës që nuk kanë pasur mundësi të vaksinohen, për shkak se në shumë shtete, siç është edhe Maqedonia, vaksinimi ende nuk ka filluar, ndërsa dozat e para pritet të arrijnë në muajin shkurt.