Pas një takimi që zgjati një orë e gjysmë, kryetari i Këshillit të BE-së, Antonio Koshta, i tha Kryeministrit Hristijan Mickoski se mund të mbështetet te Brukseli për të lehtësuar ecjen përpara në rrugën e integrimit europian. Megjithatë, nuk ka pasur ndryshime në qëndrimet e palëve. Koshta kërkoi që propozimi francez të zbatohet dhe u pyet gjithashtu nëse Unioni mund të jepte garanci se nuk do të ketë pengesa të reja gjatë rrugës në të ardhmen.
“Kur pyetët se çfarë garancish mund të kemi… është e qartë se ajo për të cilën është rënë dakord është rënë dakord. Nuk kemi asgjë më shumë për të negociuar dhe tani duhet të zbatojmë atë për të cilën ramë dakord dhe nuk ka më hapësirë për të kërkuar diçka më shumë për të negociuar”, u shpreh Antonio Koshta – kryetar i Këshillit të BE-së.
Nga ana tjetër Mickoski kërkoi vullnet të mirë dhe realizim nga pala bullgare.
“Jam i gatshëm në çdo kohë, ia përcolla këtë gatishmëri kryetarit Koshta, të vijë në Bruksel, qoftë në praninë e tij, në praninë e kryetares Von der Lejen, në praninë e çdokujt, të ulem dhe të bisedojmë, kurdoherë dhe për sa kohë të duhet, në mënyrë që të arrihet një zgjidhje e përbashkët që të dyja palët mund ta ofrojnë”, deklaroi kryeministri i vendit, Hristijan Mickoski.
Koshta theksoi se i kupton lëshimet që i ka bërë Maqedonia në rrugën drejt BE-së, por shtoi se me përkushtim mund të tejkalohen pengesat. Mickoski paralajmëroi një përkushtim edhe më të madh në periudhën e ardhshme.
“Ajo që u dakordua, u dakordua. Tani duhet ta realizojmë atë. Pikë. Nuk ka plan B, duhet ta realizojmë planin A”, tha kryetari i Këshillit të BE-së, Antonio Koshta.
“Mesazhi që e dërgoi kryetari Koshta është mesazh që ne e dëgjojmë tashmë një kohë të gjatë dhe supozojmë se ende do ta dëgjojmë nëse nuk kemi progres”, shtoi Hristijan Mickoski – kryeministër i RMV.
Mickoski theksoi se në kushte të këtilla nuk është i gatshëm për hapin e ardhshëm. Përndryshe, Koshta e mirëpriti agjendën reformuese të vendit dhe pozitën për luftën në Ukrainë, pas çka Shkupi e vazhdon turneun ballkanik në Tiranë.