“Pas çdo vështirësie, vjen lehtësimi”! Lutjet e këtij Bajrami janë që sa më shpejt të përfundojë pandemia

Pas 30 ditëve agjërim, besimtarët myslimanë festojnë Fitër Bajamin.

Manifestimi qendror u mbajt në Xhaminë “Mustafa Pasha” në Shkup.

Pas namazit, u drejtuan në shtëpitë e tyre për të uruar e festuar. Lutja më e madhe e shumicës është që pandemia të përfundojë sa më shpejtë.

“Lutja më e madhe do të ishte që të jemi shëndosh e rehat, e ta kalojmë kovidin krejt mirë e shëndosh”, tha për TV21 një besimtar që sapo fali namazin.

“Liri dhe paqe, njerëzit të shkojnë mirë njëri me tjetrin, ashtu që të jetojmë të bashkuar dhe harmoni”, u shpreh një besimtar tjetër.

“Isha lutur të hiqet kjo sëmundje, kovidi, këtë do të kisha dashur. Allahu kabull inshalla Ramazanin krejtve. Përhajër Fitër Bajrami”, tha një besimtar.

“Pas çdo vështirësie, vjen lehtësimi”, u shpreh kreu i Bashkësisë Fetare Islame, Shaqir Fetahu, duke qenë optimist se shumë shpejt do të përjetojmë largimin e sëmundjes, por tha se duhet dhënë kontribut duke u mbrojtur, e ndoshta sipas tij ky është kontributi i fundit që japim kundër pandemisë.

“Ditën e Bajramit ta festojmë me kënaqësi të veçantë, por me një kujdes të nivelit të lartë. Përsëri të vazhdojnë t’u përmbahen të gjitha masave që janë të parapara në zbehjen dhe evitimin e kësaj sëmundjeje të rrezikshme dhe ne do t’i përmbahemi rregullit të respektit ndaj masave deri në momentin kur institucionet kompetente, botërore e të vendit, do të japin qëndrimin e tyre të fundit”, u shpreh Kryetar BFI Shaqir Fetahu.

Fetahu falënderoi Qeverinë për lehtësimin e masave gjatë Ramazanit. Megjithatë edhe përskaj thirrjeve për mbrojtje maksimale, në namazin e sotëm mund të shiheshin shumë njerëz pa maska, ndërsa distanca jashtë nuk u ruajt./TV21