Kryeministri Zoran Zaev të shtunën për herë të parë ftoi opozitën për bashkëqeverisje, por me sa duket idenë për Qeveri zë zgjeruar nuk e ka konsultuar me partnerët e koalicionit.
Krahas Bashkimit Demokratik për Integrim, nga ku kryetari Ali Ahmeti u distancua nga propozimi i tillë, edhe parteri tjetër, Lëvizja Besa nuk e përkrah një ide të tillë. Kastriot Rexhepi thotë se Qeveritë e zgjeruara zakonisht bëhen në raste krizash institucionale, gjë që për momentin nuk kemi, ndërsa rikujton se opozita është faktor i rëndësishëm si korrektor i qeverisë.
TV21: Pra si Besë nuk jeni dakord me një gjë të tillë?
“Po nuk e kemi shqyrtuar në organe partiake por në parim mendojmë se nuk është e nevojshme për këtë moment. U dëshmua që Qeveria funksionon, shumica është stabile dhe mund të vazhdon t’i përmbushë detyrat e saj. Në rast se do të vinte diçka më konkrete, atëherë do të duhej ta shqyrtojmë në organet partiake”, tha Kastriot Rexhepi – deputet i Lëvizjes Besa.
Edhe partitë më të vogla kundër idesë së Zaevit për Qeveri të zgjeruar. Nga Lidhja Demokratike thonë se Qeveri të re mund të ketë pas zgjedhjeve parajlmentare.
“Vlerësojmë se nuk ka kushte që të formohet qeveri të mbështetur nga LSDM dhe VMRO-DPMNE, sepse as oferta nuk është serioze, e as përgjigja nuk është e sinqertë. Ky debat është “Kongresial”, në prag të zgjedhjes së liderit të LSDM-së dhe “Kongresit” fraksional të VMRO-DPMNE-së”, thonë nga Lidhja Demokratike.
Kundër idesë është edhe PLD-ja, që ka dy deputetë. Kryetari i saj Goran Milevski është shprehur se
“nëse duhen, le të martohen, por PLD nuk do të marrin pjesë në një dasmë të tillë”.
Lidhja e Re Social demokrate, që po ashtu ka dy deputetë, është i vetmi partner i Zaevit që deri më tani ka lavdëruar idenë për qeveri të zgjeruar. Kryetari i saj Tito Petkovski në Facebook ka shkruar se “propozimi është fer, vendet në Qeveri të ndahen në përputhje me mandatet e deputetëve në Kuvend, ndërsa Kryeministri të jetë nga partia me më shumë deputetë”.
Opozitarja VMRO-DPMNE kategorike, me LSDM-në në Qeveri jo.
“Pakt me krimin dhe kriminelët nuk ka. Kjo është përpjekje e Zora Zarvit për shpëtim të karrierës politike dhe shpëtim nga drejtësia”, potencoi Naum Stoillkovski – zëdhënës i VMRO-DPMNE-së.
Opozita shqiptare, propozimin e ka quajtur blof. Arben Taravari nga koalicioni ASH-AAA, dje u shpreh se edhe po të hynin në qeveri, nuk do të hyjnë si kukulla.
Idenë për qeveri të zgjeruar kryeministri Zoran Zaev e shpalosi javën që lamë pas, duke u shprehur se dëshiron të hapë debat për pushtet dhe Qeveri të përbashkët me opozitën, por vetëm nëse ekziston një person me të cilin mund të bisedohet, sepse siç shtoi, me Mickoskin nuk bisedohet.