VMRO-DPMNE është e gatshme që pas zgjedhjeve parlamentare të formojë shumicë parlamentare me opozitën shqiptare Lidhjen Europiane për Ndryshim. Kështu u shpreh sekretari gjeneral i VMRO-DPMNE-së, Gjorgjia Sajkoski. Sipas tij VMRO edhe tani ka bashkëpunim aktiv me një pjesë të opozitës, duke përmendur bashkëpunimin me Bilall Kasamin në Tetovë. Sipas tij, VMRO është e hapur për bashkëpunim me partitë shqiptare, nëse e pranojnë programin e tyre.
“Mendoj se ata janë pjesë e opozitës shqiptare të cilat natyrisht me opozitën maqedonase mund ta formojnë shumicën e ardhshme në Kuvend. Kjo nuk është asgjë për t’u habitur, nuk është diçka që nuk mund ta pranojmë. Gjithsesi kjo varet edhe prej tyre, jo vetëm nga VMRO-DPMNE”, tha Gjorgjija Sajkoski, sekretar gjeneral i VMRO-DPMNE-së.
E të njëjtit mendim është edhe opozita shqiptare. Fadil Zendeli nga Lëvizja Besa, tha se nuk ka asgjë të keqe që të bashkëpunohet me VMRO-DPMNE-në pas zgjedhjeve parlamentare, me qëllim formimin e institucioneve qeverisëse.
“Nuk ka asgjë të keqe të bashkëpunojmë njëri me tjetrin, edhe të kemi bashkëpunim edhe me VMRO-në. S’ka kurrgjë të keqe. Proceset zgjedhore janë ato që përcaktojnë legjitimitetin e subjekteve politike të cilat marin pjesë në procesin zgjedhor. Rezultatet të cilat do të jenë produkt i këtij procesi zgjedhor, janë bazë e krijimit të institucioneve të reja. Nëse ne si opozitë shqiptare do të jemi ajo pjesa që t’i përfaqësojmë shqiptarët nuk ka asgjë të keqe që me VMRO-në të krijojmë qeverisje të re”, tha Fadil Zendeli, deputet nga L.Besa.
Për në zgjedhjet e ardhshme parlamentare mbetet e hapur dilema nëse do të respektohet marrëveshja e koalicionimit fituesi me fituesin. Kjo marrëveshje u shkel në zgjedhjet e kaluara kur BDI vendosi të bëjë koalicion me LSDM-në, edhe pse VMRO-DPMNE fitoi zgjedhjet por dështoi të formojë qeveri në afatin e parë.