Partitë në pushtet dalin me Manifest, kërkojnë mbështetje për zhvillimin e bisedimeve për integrim në BE

Partitë politike në koalicionin qeveritar të udhëhequr nga LSDM dhe BDI propozuan nënshkrimin e një manifesti të përbashkët përmes së cilës do të jepet mbështetje për udhëheqjen e negociatave për anëtarësim të plotë në BE dhe përmes së cilës bëhet thirrje për unifikim të të gjitha partive, e duke aluduar mbështetje për ndryshime kushtetuese nga VMRO-DPMNE e cila ende me ngulm refuzon t’i votojë të njëjtat. Nga BDI thonë se tani është koha e bashkimit të të gjitha partive politike, subjekteve apolitike dhe organizatave joqeveritare me qëllim zhvillim efikas dhe cilësor të negociatave për anëtarësim në BE.

“Me këtë manifest paraqesim një numër argumentesh që janë me rëndësi jetike për mbarë shoqërinë, dhe përmes të cilave zotohemi se do t’i përfundojmë negociatat për anëtarësim në një kohë sa më të shkurtër, njëherit duke mbrojtur identitetin, traditën, gjuhën dhe vlerat shoqërore të qytetarëve dhe bashkësive në vend”, thonë nga BDI.

Pjesë e Manifestit është edhe Aleanca për Shqiptarët. Nga kjo parti theksojnë se integrimi i vendit në BE është qëllim strategjik ndërsa ASH këtë e ka mbështetur edhe në opozitë edhe tani në pushtet.

“ASh beson se është koha që të bashkohen të gjithë partitë politike, subjektet apolitike dhe organizatat joqeveritare përmes këtij hapi të rëndësishëm të nënshkrimit të Manifestit të përbashkët, me të cilin të gjithë së bashku do të obligohemi për zhvillim efikas dhe cilësor të negociatave për anëtarësim në BE”, theksojnë nga ASH.

Manifestin e publikoi edhe LSDM. Prej atje thonë se kjo është një bazë e mirë për ndërtimin e një bashkimi rreth të ardhmes së vendit.

“Në Manifest qartë është shënuar se partitë politike në Kuvend, pa dallim të përbërjes së shumicës qeveritare, obligohen të bashkëpunojnë, por edhe të udhëheqin procesin negociues në mënyrë të hapur dhe transparente, me qëllim që publiku i gjerë të jetë në mundësi të shprehë mendimin lidhur me kushtet për anëtarësim në BE. Tani duhet të bëhet hap përpara, të sillet vendim për miratimin e ndryshimeve kushtetuese dhe anëtarësim të shpejtë në BE”, deklarojnë nga LSDM.

Për partinë opozitare maqedonase VMRO-DPMNE, kjo dëshmon se me këtë dokument asgjë nuk ka lëvizur në drejtim të realizimit të interesave strategjike të shtetit, dhe mungesë të kapacitetit për ndërtim të konsensusit.

“Me këtë hap pushteti edhe njëherë e lëshon mundësinë për konsensus. Janë ulur Bujar Osmani, Artan Grubi dhe ndoshta Bojan Mariçiq, kanë nënshkruar dokument dhe e kanë emëruar manifest, dhe pasi ata vet e kanë definuar, e kanë lëshuar në formë të komunikatës përmes shërbimit të LSD-së deri te publiku, me thirrje që VMRO-DPMNE të pranojë një dokument të shkruar. Me këtë hap, ata pranojnë se nuk kanë lëvizur asnjë milimetër në drejtim të realizimit të interesave strategjike të shtetit, ata tregojnë mungesë të kapacitetit për ndërtim të konsensusit. VMRO-DPMNE pasi zyrtarisht ta pranojë këtë dokument, nëse ka bazë për shqyrtim, do ta analizojë dhe do të del me qëndrim”, u shpreh Naum Stoillkovski – zëdhënës i VMRO-DPMNE-së.

Nënshkrues të Manifestit janë 12 parti, të gjitha pjesë e shumicës qeveritare.