Tubimet publike të partive politike mbaruan, por efektet e saja do të dihen nga java e ardhshme. Kjo për shkak se, edhe pse patëm një protokoll për realizimin e tyre, i njëjti kah fundi i fushatës dhe ditën e zgjedhjeve nuk u respektua. Të gjithë pamë se si në vende të njëjta grumbulloheshin numër i madh i qytetarëve, pa maska dhe pa distancë.
Por a i ka mbikëqyr tubimet ndonjë institucion dhe meqë shihen shkelje, a do të kemi edhe rritje të rasteve me Kovid-19? Nga Ministria e Shëndetësisë me përgjigje:
“Institucioni i cili është përgjegjës për kontrollim të tubimeve publike në të hapur është Ministria e Punëve të Brendshme. Gjeneralisht mosrespektimi i masave e rrit rrezikun për mundësi të transmetimit të virusit Kovid-19. Për këtë në kontinuitet janë apelet e autoriteteve shëndetësore që të respektohen masat. Vetëm duke mbajtur maska, duke qëndruar në distancë fizike dhe duke i larë duart shpesh, mund të ndalohet shpërndarja e virusit”, njoftuan nga Ministria e Shëndetësisë për TV21.
Se kur mund të presim efektet e zgjedhjeve dhe a pritet rritje e numrit të të infektuarve, nga Instituti i shëndetit publik me përgjigje:
“Nuk mund ta parashikojmë tash për tash. Efektet priten nga java e ardhshme”, i thanë TV21 nga Instituti i Shëndetit Publik.
Ministri i Shëndetësisë, Venko Filipçe ka disa ditë që nuk del në konferencë për media, por ai para se të fillojë fushata kishte kumtuar kushtet në të cilat mund të realizohen tubimet partiake.
“Të shmanget koncentrimi i një numri të madh të njerëzve në mjedis të vogël. Fushata derë më derë duhet të realizohet gjithashtu sipas këtyre protokolleve. Detyrimisht të mbahet pajisje mbrojtëse, të mbahet distanca dhe të mos shkohet në shtëpi”, pati kujtuar Filipçe.
Përndryshe, në vendin tonë ende regjistrohen shifra treshifrore të të infektuarve nga Covid-19, ndërkaq procesi zgjedhor u realizua nën protokoll të veçantë kundër Covid-19. Megjithatë, edhe pse u rekomandua që të mos organizohen tubime të mëdha, të njëjtat i pamë të pranishme. Kohë më parë zgjedhje u mbajtën edhe në Serbi, dhe të dhënat atje treguan se pas zgjedhjeve u rritën rastet dhe vendi iu rikthye izolimit gjë e cila shkaktoi revoltë te qytetarët.