“Edhe njeriu i shëndetshëm për një kohë të shkurtër do të sëmuret”, tha drejtori i Drejtorisë për ekzekutimin e sanksioneve, Aleksandar Pandov gjatë vizitës së repartit për paraburgim në burgun në Shutkë, që e pati vizituar kohë më parë. Madje ai rikujtoi se këtu me muaj dhe vite dënimin e kanë vuajtur të dënuarit politikë të VMRO-DPMNE-së.
“Atje po të lidhësh një qen, i njëjti do të sëmuret fizikisht dhe psikikisht. Atje ka qeli që janë nën çdo dinjitet njerëzor, unë këtë nuk e kam parë as në film atë që e pashë në disa prej qelive, tash prapë u rrëqetha, kjo është nën çdo dinjitet njerëzor”, tha Aleksandar Pandov.
Pandov paralajmëroi se deri në fund të mandatit do të ndërtojë një repart për paraburgim në burgun e Idrizovës, sepse atje tashmë ka edhe një sallë të gjyqit që u ndërtua me para europiane e cila nuk funksionon prej vitesh. Në këtë mënyrë thotë se do të kursehen para.
“Çdo person të dyshuar e dërgojmë në Shutkë, çdo transport nga Shutka deri te Gjykata Penale, neve si qytetarë na kushton 42 mijë denarë, andej-këndej. Nëse janë 4 persona, kjo bën 170, përkatësisht 168 mijë denarë”, tha Pandov.
Përveç kushteve, sfida e madhe është edhe ajo që mungojnë 200-300 policë të burgut.
“Një pjesë janë angazhuar në aksione të ndryshme, një pjesë kanë dalë në pension”, deklaroi ai.
Në burgun e Idrizovës u lëshua në përdorim një repart i rinovuar ku do të mund të akomodohen të burgosurit. Vendet do të plotësohen me të burgosur nga pjesa e stërmbushur në Idrizovë, që është për të burgosur për vepra të rënda penale.