“Pakica mundohet t’i imponohet shumicës”/ Osmani thotë se “Grupi i zjarrit” nuk ka të drejtë të ankohet

Zëdhënësi i integristëve, Bujar Osmani, njëkohësisht edhe Ministër i Jashtëm, duke folur për pakënaqësitë e disa anëtarëve në BDI të njohur si “grupi i zjarrit”, në Click Plus të TV21 tha se janë një numër i vogël të cilët i kundërshtojnë punët e partisë dhe që duan që të imponojnë mendimet e pakicës mbi ato të shumicës, por siç shtoi, në demokraci respektohet shumica.

“Ata që nuk kanë votuar nuk kanë të drejtë ankese, ata që e kanë mbështetur, ata mund të kërkojnë llogari dhe përgjegjësi. Po paramendoni Ali Ahmeti të ndërronte ministra për shkak se i kujtohet dikujt, i kujtohet  një grupi që të ndryshon vendimet e shumicës, ai nuk është më institucion, BDI është parti serioze, ne e nënvlerësojmë peshën të kësaj organizate politike e cila është e jashtëzakonshme me 20 vite fitore”, tha Bujar Osmani, BDI.

Nga ana tjetër Izet Mexhiti nga “grupi i zjarrit” mendon se kryetari i BDI-së Ali Ahmeti i është nënshtruar ndikimit të dikujt tjetër.

“Në BDI diçka po ndodh dhe BDI-ja shndërrohet në diçka që edhe ne që jemi prej në fillim nuk mund ta njohim, pra si subjekt politik në shumë punë, por nuk e prisnim që kryetari t’i nënshtrohej këtij lloj ndikimi. E dëgjova atë, ajo do të thotë se po pretendojmë për bashkimin europian, por me mesazhe kërcënuese, nuk do të shkojmë”, deklaroi Izet Mexhiti, BDI.

Përveç, sipas Mexhiti, Osmani nuk është koordinator për çështje politike në Çair, sepse siç u shpreh, një funksion i tillë në statutin e BDI-së do të krijonte dualizëm dhe ndarje në degë.