Pa maska e pa distancë, aheng i madh mbrëmë në lagjen Aerodrom

Në lokalin “Biser” në lagjen Aerodrom mbrëmë kishte aheng.

Në një video të publikuar në Facebook shihen të rinjtë duke u argëtuar, por pa menduar për pandeminë duke mos mbajtur distancë fizike dhe maska.

Por festa u mbaroi kur Inspektorati i Tregut në mesnatë e vizitoi këtë lokal dhe ndaloi festën.

Nga Inspektorati i Tregut thonë se lokali do të mbyllet për 30 ditë, vendimi është përgatitur sot ndërsa është njoftuar edhe Ministria e Brendshme.

“Nuk janë respektuar protokollet, maksimumi do të jetë 30 ditë mbyllja e lokalit.

Vendimi është përgatitur nga dita e sotme, dhe do t’i dërgohet i vulosur.

Ndërsa janë njoftuar edhe Ministria e Brendshme se nuk janë respektuar protokollet. Meqenëse nuk është i regjistruar tatimpaguesi, ne nuk mund të bëjmë padi penale”, thonë nga Inspektorati i Tregut.

Prolongimi i vitit shkollor si duket nuk po paraqet problem që nxënësit të mos shoqërohen.

Me videon që mbrëmë u publikua u pa që shumë të rinj ishin mbledhur për të kaluar natën bashkë.

E gjatë ditës së djeshme pak para se të fillonte ahengu në lagjen Aerodrom, ministri i Shëndetësisë Venko Filipçe i luti prindërit që të kenë kujdes me fëmijët e tyre.  

 “Unë u bëj thirrje të gjithë prindërve, mësuesve, të gjithë menaxhmentit, institucioneve arsimore, ta marrin sa më seriozisht zbatimin e masave për mbrojtje kundër Kovid-19. Roli ynë si prindër është i pazëvendësueshëm. Ne duhet të punojmë me fëmijët tanë dhe t’i përgatisim ata për mënyrën e re të mësimdhënies”, tha Venko Filipçe, Ministër i Shëndetësisë.

Ndërsa sipas ministrisë, hapja e shkollave është prolonguar për më 1 tetor, tek sa ende mbetet e paqartë se në çfarë forme do të mbahet mësimi. Këto tubime të të rinjve anatemojnë me çdo kusht idenë e mësimit online pasi që i njëjti edhe sikur të zbatohej nuk do të kishte asnjë lloj efekti.