Vazhdojnë përplasjet mes Frontit Europian dhe koalicionit VLEN për atë se cili prej tyre do të jetë përfaqësues legjitim për shqiptarët në përbërjen e re qeveritare. Duke komentuar paralajmërimet se kreut të VMRO-DPMNE-së, Hristijan Mickoski, se VMRO preferon VLEN-in si partner qeveritar, Bujar Osmani nga Fronti Europian tha se ata mund ta marin VLEN-in vetëm në kuadër të koalicionit të tyre të quajtur “Maqedonia përsëri e jotja” por për atë se kush i përfaqëson shqiptarët në Qeveri, thotë se do të vendosë populli në zgjedhje.
“Unë thash, z.Mickoski VLEN-in mund ta fton në kafe në qytet, në shtëpi, ose në koalicionin “Maqedonia përsëri e jotja”. Dhe nëse VLEN-i thotë se do të jemi në Qeveri si pjesë e koalicionit të VMRO-DPMNE-së dhe partnerëve të tyre sepse ata kanë 20 parti politike brenda. Nëse e kanë edhe VLEN-in, në rregull jempi ne nuk kemi asgjë. Por përfaqësues të popullit shqiptar do të jenë ata që i zgjedhë populli”, tha Osmani.
Ndërkohë nuk mungoi dhe kundër përgjigja e Izet Mexhitit nga koalicioni VLEN. Përmes një statusi në FB profilin e tij, Mexhiti thotë se VLEN nuk shkon nëpër selitë partiake e nëpër hotelet e Mijallkovit për të pirë kafe e për t’i lutur që të bëhen pjesë e Qeverisë.
“Mos baj dert Bujar, se VLEN nuk shkon nëpër seli partiake e nëpër hotelet e Mijallkovit për te pirë kafe e për t’i lutur që të bëheni pjesë e Qeverisë, siç jeni duke bërë këto ditë ti, Artani, Menduhi dhe shokët tuaj. Qeveria e re, Bujar, do t’i përfaqësojë edhe shqiptarët, edhe turqit, edhe boshnjakët, edhe romët, edhe Badinterin. Qeveria e re, ndërkaq, nuk do ta perfaqësojë BDI-në, të cilën e kanë braktisur të gjithë, dhe as Nikolla Gruevskin, i cili është azilant nga drejtësia”, ka thënë Mexhiti.
Qëndrimet e VLEN-it se ata do t’i përfaqësonë shqiptarët në Qeveri i komentoi edhe kreu i BDI-së, Ali Ahmeti. Gjatë tubimit të djeshëm në Haraçinë, tha se VLEN dëshiron që nga klasa e parë të shkojë drejt në universitet.
“Po nuk shkohet prej klasës së parë në Universitet. Ata kërkojnë prej klasës së parë, menjëherë të shkojnë në Universitet, nuk shkohet”, tha Ahmeti.
Kujtojmë se në rrethin e parë të zgjedhjeve presidenciale, Fronti Europian fitoi rreth 120 mijë vota ndërsa koalicioni VLEN rreth 80 mijë vota. Megjithatë siç tha dje Izet Mexhiti, ato kanë qenë zgjedhje presidenciale ndërsa në zgjedhjet parlamentare do të ketë fotografi tjetër. Është i bindur se VLEN do të jetë pjesë e shumicës parlamentare e cila do të përbëhet prej së paku 75 deputetëve.