Osmani gati t’ia prezantojë bisedimet VMRO-së! Milloshovski: Ministri s’ka çfarë kërkon në seli, le të vijë në Kuvend

Ministri për Punë të Jashtme, Bujar Osmani, shprehet i gatshëm që bisedimet mes Shkupit dhe Sofjes t’ia prezantojë opozitares VMRO-DPMNE, nga të cilët shpreson më shumë konstruktivitet, edhe pse e kupton që politika ditore nuk i lë rehat.

“Unë kam qenë i hapur të bëhem edhe urë në mes opozitës dhe pozitës. U kam ofruar publikisht VMRO-DPMNE-së që të shkoj edhe në zyrën e tyre të prezantoj debatin me Bullgarinë”, tha Bujar Osmani – Ministër i Punëve të Jashtme.

Për këtë deklaratë të krye diplomatit të vendit, deputeti i VMRO-DPMNE-së Antonio Milloshovski ka dy dilema, ose Osmani nuk e ka lexuar Rregulloren e Kuvendit, ose po bëhet naiv.

“Ministrat për Punë të Jashtme nuk shkojnë nëpër parti politike të shpjegojnë se cila është politika e jashtme dhe pse negociohet dhe cilat janë qëllimet, por Ministrat për punët të jashtme edhe në Slloveni, Bullgari, Gjermani e Itali, shkojnë në Parlamentet e tyre, prandaj konsideroj se me këtë deklaratë Ministri Bujar Osmani fillimisht, me mosardhjen në Kuvend nuk e respekton Kuvendin dhe qytetarët që kanë votuar deputetët dhe ministrat, dhe e dyta, nuk i respekton vlerat evropiane”, u shpreh Antonio Milloshovski – deputet i VMRO-DPMNE-së.

Milloshovski rikujton se standardi evropian është që Kuvendi duhet të jetë mekanizëm kontrolli. Detyrë e Ministrit të Jashtëm, thotë ai, është që së paku 2 herë në vit Ministri të dalë para komisionit kuvendor për punë të jashtme. Shton se do të përpiqen edhe disa herë që ta sjellin Osmanin në Kuvend të japë shpjegime. Nëse nuk e bën këtë, Milloshovski, paralajmëron nismë për mosbesim ndaj qeverisë, ose interpelancë ndaj Ministrave në veçanti, varësisht hapit që do të vendosin të ndërmarrin.