Jo të gjitha shtetet anëtare të Bashkimit Evropian e mbështesin nisjen e negociatave me Maqedoninë e Veriut dhe nuk ka aq shumë entuziazëm për zgjerimin në Ballkan, pohon shefja e diplomacisë bullgare Ekaterina Zaharieva.
“Jo të gjithë e mbështesin Maqedoninë, të jemi të sinqertë. Nuk ka aq entuziazëm që nesër ndonjëri shtet i Ballkanit Perëndimor të bëhet anëtare e BE-së. Kur të nisin negociatat, atëherë”, deklaroi Zaharieva.
Të kundërtën e thotë Ministri për Punët të Jashtme i Maqedonisë së Veriut, Bujar Osmani.
“Deri më tani mendoj se është absolute mbështetje pa mëdyshje, e të gjithë vendeve anëtare të BE-së në lidhje me nevojën dhe pritshmërinë e tyre për mbajtjen e konferencën e parë ndërqeveritare në dhjetor dhe kjo jo vetëm për shkak se kjo është mbështetje e tyre parimore por për shkak se është e merituar”, tha Osmani.
Kryediplomati i vendit vlerëson se Bullgaria mbështet integrimin evropian të rajonit, në mos për asgjë tjetër, për interesin e tyre gjeostrategjik. Ripërsëriti qëndrimin e vendeve anëtare se çështjet dypalëshe nuk duhet të jenë pjesë dhe ta kushtëzojnë e procesin. I pyetur për mbështetjen amerikane ndaj Maqedonisë në kontestin mes Shkupit dhe Sofjes, Osmani thotë se çdo gjë e mire që i ka ndodhur vendit që nga pavarësia, ka qenë e ndihmuar nga SHBA-të.
“Unë pres që tani me tranzicionin e pushtetit edhe një angazhim edhe më të madh të SHBA-ve në drejtim të mbështetjes tonë, ashtu siç ka qenë pa ekujvok edhe deri më sot”, shtoi Osmani.
Osmani këtë e tha në promovimin e pullës postare për 25-vjetorin e vendosjes së marrëdhënieve diplomatike mes vendit tonë dhe SHBA-se. Online të pranishëm ishin edhe ambasadorja amerikane Kejt Meri Bërns dhe ndihmës sekretar shtetëror për Evropë dhe Euroazi, Filip Riker. Mundësi për pyetje nuk kishte, e as ata vetë nuk e përmendën kontestin gjuhësor e historik që po i bëhet Maqedonisë, megjithatë hyrjen e fjalimit të tij Riker përzgjodhi ta bëjë në maqedonisht.
“E studiova gjuhën, njoha shumë njerëz, shumë prej tyre i bëra shokë me të cilët ende takohem e dëgjohem, nga ta mësova maqedonisht”, deklaroi Riker.
Pas vetos bullgare që ju bë Maqedonisë së Veriut për nisjen e bisedimeve, Ministri i punëve të Jashtme, vlerëson se tani është koha që duhet ulur dhe reflektuar për atë që ngjau si dhe qasjen dhe dinamikën e bisedimeve të mëtejshme që duhet të vazhdojnë. Pret që menjëherë pas festave të fundvitit të vazhdojë komunikimi me homologen Zaharieva. Zyrtarisht Sofja ende nuk i është përgjigjur non-pejpërit me propozimin e Maqedonisë së Veriut për zgjidhjen e mundshme. Osmani tregon se fqinji lindor ende po e shqyrton tekstin. Vetoja që ndodhi në BE, sipas tij, nuk guxon të ndikojë në marrëdhëniet mes dy vendeve dhe në kërkimin e një zgjidhjeje.