Nëse Kryeministri Zoran Zaev ka ndërmend ta zgjerojë shumicën, le të na ftojë që të kuptojmë se cili është koncepti i tij, tha në Click Plus kreu i Alternativës, Afrim Gashi, partner i koalicionit me Aleancën për Shqiptarët.
“Nëse unë jam i bindur se zgjidhet shtetësia, zgjidhet rruga Shkup-Bllacë, bëhen investime kapitale, rimëkëmbet ekonomia, po hyj. Nëse kjo i bën vetëm numra Zaevit, çfarë interesi kam unë të jem pjesë e një qeverie?!”, u shpreh Afrim Gashi – kryetar i Alternativës.
Nëse ideja është për një qeveri që do të jetonte deri në zgjedhjet e ardhshme parlamentare, Gashi thotë se do të ulej me partnerin e koalicionit Ziadin Selën, për të folur për kushtet që burojnë nga programi i tyre zgjedhor. Një kusht tjetër që ai përmendi, është largimi i Bashkimit Demokratik për Integrim.
“Nëse sot z.Zaev na bën thirrje që të bëhemi pjesë e qeverisë, ne natyrisht që do ta vendosim kusht që BDI të mos jetë aty”, shtoi kryetari i Alternativës, Afrim Gashi.
Po me sa duket ideja e Kryeministrit nuk është e tillë. Ai, ndonëse nuk e ka diskutuar as me partinë e vet e as me partnerët e koalicionit, Zoran Zaev i fton të gjithë që të bashkohen në ekzekutiv që shteti të ecë më shpejtë përpara. Ka vetëm një shqetësim, kreun e VMRO-DPMNE-së Mickoskin.
“Tani në këtë periudhë tani, e dyta pas zgjedhjeve lokale, pas zgjedhjeve të ardhshme të rregullta parlamentare ose kurdo qoftë që të mund të dihet qartë përcaktimi im personal rreth kësaj çështjeje. Gjithashtu qartë kam thënë se me Mickoskin kjo punë nuk bëhet, sepse jam përpjekur me gjithçka, me të gjitha aktivitetet e bllokimit, përfundimisht qëllimi nuk është që bashkë të bëhemi për bllokimin e çdolloj perspektive të popullit dhe atdheut tonë”, deklaroi Zoran Zaev – Kryeministër i Maqedonisë së Veriut.
Po nga pohimet e deritanishme të opozitares VMRO-DPMNE, me sa duket as Mickoski nuk e ka ndërmend të bashkëqeverisë me rivalin e tij politik. Nga pallati i bardhë dje thanë se “pakt me krimin dhe kriminelët nuk ka”.
Edhe partnerët shqiptarë në Qeveri, BDI e Lëvizja Besa nuk kanë dhënë sinjale pozitive rreth kësaj ideje. Kreu i integristëve Ali Ahmeti u distancua, ndërsa nënkryetari i Besës, Kastriot Rexhepi, për TV21 ka deklaruar se në parim nuk e përkrahin propozimin e kryeministrit. Zëra kundër ka pasur edhe në mesin e partive më të vogla që janë pjesë e qeverisë.