Po bashkohen Lëvizja Besa, Alternativa dhe lëvizja e re e Izet Mexhitit. Qëllimi i këtij bashkimi siç thonë tre liderët e këtyre subjekteve politike, është krijimi i frontit opozitar shqiptar. Madje, këto tre parti në zgjedhjet e ardhshme pritet të dalin me një program të përbashkët parazgjedhor.
Orteku tashmë ka filluar, përmbysja e këtij pushteti është në horizont, shkroi Afrim Gashi i Alternativës menjëherë pas takimit. Por ky front si duket nuk u pëlqen disa aktorëve politik brenda këtyre partive. Si në Alternativë, ashtu edhe në Lëvizjen Besa ka pakënaqësi, e të cilat shkaktuan madje ndarje të rrugëve.
Mbrëmë nënkryetari i Lëvizjes Besa njoftoi se distancohet plotësisht nga veprimet politike të bllokut opozitar, sepse sipas tij, kjo nismë ka për qëllim vetëm “lavazhin” e figurave politike të cilët mbajnë gjallë të qeverisjes aktuale.
“Më lejoni që përmes këtij postimi t’ju njoftoj se nga sot distancohem plotësisht nga veprimet politike në të ashtuquajturin “bllok opozitar”, duke vlerësuar se aktorët kryesor, bartës të kësaj nisme nuk kanë për qëllim rotacionin politik, por thjeshtë “lavazhin” e figurave politike të cilët jo shumë larg nga sot ishin pikërisht aktorë për mbajtjen gjallë të qeverisjes aktuale dhe parandaluan rotacionin në kampin politik shqiptar”, tha Arjanit Hoxha –nënkryetar i Lëvizjes Besa.
Duke publikuar fotografi të përbashkët me Hoxhën e me mbishkrimin “bashkë deri në fund”, edhe deputeti Bastri Bajrami bëri të ditur se mbështetë vendimin e Hoxhës e jo të Kasamit. Se si do të veprojnë më tej këto dy figura politike, pritet të njoftojnë brenda javës. Nënkryetari Bujar Osmani në SummerClick tha se me të dy ia vlen të bisedohet me qëllim që t’i bashkëngjiten frontit evropian.
“Deri tash jo por natyrisht se ia vlen të bisedohet për shkak se BDI ka nisur idenë e frontit europian duke vlerësuar se tani është koha për koncentrimin e energjisë europiane në vend duke e parë se po polarizohet shoqëria në vend. Dikur debati ishte mbi tema të ndryshme. Tash po qartësohet kush është për Europë dhe kush do ta mbanë vendin peng që ti jepet ndoshta një hapësirë për ndërrim të kursit strategjik të shtetit”, u shpreh Bujar Osmani, nënkryetar i BDI-së.
Përndryshe Izet Mexhiti vendosi që më 13 gusht të formojë edhe zyrtarisht lëvizjen e re politike, ndërsa në këtë rrugë nuk iu bashkangjitën shokët fraksionist Blerim Bexheti, Nevzat Bejta e Musa Xhaferi. Që të tre, do të vazhdojnë të debatojnë brenda BDI-së.