“Gjatë ditës së djeshme në shumë pompa të benzinës në vend kishte mungesë të derivateve të naftës, ndërkaq sot ky problem duket se nuk është, pasi që qytetarët po furnizohen pa asnjë problem”, raporton gazetarja e TV21, Sara Kajolli.
Furnizimi është i rregullt me çmimet e reja të shtrenjtuara që Komisioni Rregullator për Energjetikë caktoi dje.
E për këto rritje reaguan nga opozitarja Aleanca për Shqiptarët dhe VMRO-DPMNE. Sipas tyre kjo rritje godet drejtpërdrejt qytetarët, ndërsa kërkojnë ulje të akcizës dhe TVSH-së.
“Ulja e akcizës nga 22 denarë për benzinën në 15 denarë, si dhe për dizelin nga 15 denarë që është aktualisht, në 9 denarë. 2. Ulja e tatimit mbi vlerën e shtuar, TVSH-së, nga 18% në normën preferenciale prej 5 %, njëjtë siç vepruan me çmimin e energjisë elektrike që po ashtu ishte propozim i Aleancës për Shqiptarët dhe rezultoi pozitivisht edhe pse fillimisht Qeveria ishte skeptike dhe refuzonte”, tha Arben Zeqiri, zëdhënës i ASh-së
“Komiteti Ekzekutiv i VMRO-DPMNE-së kërkon pranimin e menjëhershëm dhe pa shtyerje të masës së VMRO-DPMNE-së për uljen e akcizës për derivatet për 50%. Me këtë masë, derivatet dizel do të lirohen për 9,5 denarë, ndërsa benzina për 13 denarë”, tha Marija Miteva, zëdhënëse e VMRO-DPMNE-së.
Për rritjen e çmimeve njësoj reagoi edhe Lëvizja Besa. Nga atje thonë se rritja e çmimeve veçanërisht të derivateve të naftës po godet në mënyrë të drejtpërdrejte bizneset e mesme, klasën e mesme dhe të varfër të shoqërisë.
Tv21 pyeti Qeverinë e Republikës së Maqedonisë së Veriut nëse po planifikohet ulja e akcizës dhe TVSH-së, por nga atje nuk konfirmuan nëse një gjë e tillë do të parashihet me masat e reja që pritet të vendosen.
“Në të ardhmen e afërt do të dalim me masa të fokusuara tek qytetarët dhe për të ruajtur likuiditetin e ekonomisë dhe vendeve të punës, si dhe masa për kategoritë më të prekshme për të zbutur goditjet e çmimeve”, njoftuan nga Qeveria.
Sipas Entit për Statistika, inflacioni në shkurt 2022, krahasuar me shkurt 2021, shënoi rritje prej 7.6%. Megjithatë nga Qeveria thonë se masat e ndërmarra deri tani kanë parandaluar tronditje shtesë të çmimeve.