Opozita kërkon Qeveri për shpëtim nacional! Qeveria e gatshme për të dëgjuar, por jo edhe për ta realizuar

Idenë e opozitës për qeveri të zgjeruar, Qeveria është e gatshme ta dëgjojë vetëm si propozim, por duket se nuk e ka ndërmend edhe ta bëjë realitet.

“Çdo ide është e mirëseardhur. Mendoj që opozita në këtë moment do të duhej të fokusohej në ide konstruktive se si të ballafaqohen me krizën dhe të ndihmojmë procesin e  ballafaqimit të krizës ekonomike dhe shëndetësore dhe mendoj që pastaj do të flisnim për të tjerat”, tha Fatmir Bytyqi – zëvendëskryeministër.

Një ide e këtillë fillimisht doli nga Sekretari Gjeneral i Aleancës për Shqiptarët, Arben Taravari, që propozoi qeveri të zgjeruar për përballje me pandeminë, e që po gjen mbështetje edhe nga partia më e madhe opozitare VMRO-DPMNE.

“Menjëherë tani ndoshta duhet të fillojmë të mendojmë për një ide të nisur nga Aleanca për Shqiptarët për qeveri për shpëtim nacional, qeveri teknike, ose ndonjë formë tjetër, sepse këta janë politikanë të paaftë”, theksoi Hristijan Mickoski – kryetar i VMRO-DPMNE-së.

Qeverinë e zgjeruar, ku do të ishin të gjithë aktorët politik, kreu i Aleancës për Shqiptarët, Ziadin Sela, e sheh si mënyrë për të krijuar balanc e që do të kontrollonte politikat qeveritare.

“Qytetarë që votuan kundër qeverisë nuk janë të barabartë as kur duhet të marrin ndonjë ndihmë sociale, si masë që propozohen nga Qeveria, andaj nëse duhet të jemi të barabartë para Kuvendit si deputetë, duhet edhe qytetarët tanë të jenë të barabartë. Ne jemi të gatshëm të marrin përgjegjësi”, theksoi Ziadin Sela – kryetar i Aleancës për Shqiptarët.

Tre javë më parë, kryeministri Zoran Zaev kur u pyet nga TV21 për këtë ide, njëjtë si Bytyqi sot, u pat shpreh i hapur për të dëgjuar ide, por me pesimizën se opozita do të sillte ndonjë të mirë në qeveri.

“Nëse arrin ndonjë propozim do ta rishikojmë. Nuk besoj në diçka më të rëndësishme nëse opozita hyn në qeveri dhe se do të rritet kapaciteti i shtetit. Pse?! Për shkak të papërgjegjësisë, sidomos flas për opozitën maqedonase?! Jo”, deklaroi Zoran Zaev – kryeministër.

Pushteti aktual ka shumicë të brishtë në Kuvend, me vetëm 62 vota deputetësh. Javëve të fundit ka pasur edhe deputetë në izolim për shkak të infektimit ose kontakteve me të infektuar me COVID-19. Si pasojë, prania e opozitës shpesh është e domosdoshme në Parlament, sepse nuk arrihet kuorumi i nevojshëm.