Opozita akuzon se Qeveria nuk ka plan për eurointegrim, ndërsa pushteti pohon se po punon në gjetjen e zgjidhjes. BDI me kritika se jemi larg perspektivës europiane.
“Edhe pse integrimi në BE u shpall si prioritet numër një, ky proces është plotësisht i bllokuar, pa asnjë plan dhe pa asnjë perspektivë të parashikueshme për zhbllokim. Qytetarët tanë shohin në heshtje se si Shqipëria, Mali i Zi, por tashmë edhe vende të tjera të lindjes, po ecin me hapa të sigurt drejt realitetit të ri evropian”, thotë BDI.
Pasi që presidenti i Këshillit të BE-së, Antonio Koshta, në Shkup, ka thënë se nuk është i pranueshëm propozimi për ndryshime kushtetuese me prapaveprim, ministri për çështje europiane, Orhan Murtezani, thotë se ky nuk është propozimi i vetëm.
“Këmbëngulja jonë nuk është për një propozim konkret, por mënyrë që të arrijmë deri te këmbëngulja jonë që të mos ketë bileteralizim më tej. Edhe në takim edhe në konferencë për media kryeministri Mickoski theksoi se është i gatshëm për bisedime, megjithatë që të ndodhin ato bisedime e patjetërsueshme është që së pari t’i besojmë edhe BE-së dhe nën dy të fillojmë të ndërtojmë besim të ndërsjellë me Bullgarët”, tha Orhan Murtezani.
Përderisa bllokimi drejt BE-së vazhdon për shkak të kushtit politik, autoritetet pohojnë se në mënyrë të përforcuar po punojnë në agjendën reformuese të harmonizuar me Brukselin. Zv.ambasadori u bëri thirrje të gjithë palëve të interesit që të vëzhgojnë reformat.
“Të sigurohet se reformat zbatohen në terren dhe në kohë të duhur, të sigurohet se investimet janë të orientuara aty ku ka më së shumti nevojë”, deklaroi Ben Nupnau.
Maqedonia tashmë ka filluar të marrë para nga Plani për rritje. Një pjesë e tyre do të jenë mbështetje e drejtpërdrejtë buxhetore, ndërsa pjesa tjetër do të shpenzohet për 19 projekte investuese, por tani për tani nuk shpalosin për cilat. Nga ajo që është e sigurt, prej 16 ligjeve të reja të parapara me afat deri në qershor, vendi do të vonohet me reformat në Kodin zgjedhor dhe Ligjin për Këshillin gjyqësor.