Ombudsmani me kritika për mësimin online, Bajramovska-Mustafa: Jemi shumë vonë me protokollet

Avokati i Popullit ka dërguar letër deri te Ministria e Arsimit dhe Shkencës duke renditur një sërë mangësish për mënyrën se si u realizua mësimi online. Vlerësojnë se mësimi online ishte shumë pasiv, pasi sipas tyre, nxënësit në orë mësimore kanë qenë të pranishëm më shumë sa për të përfunduar vitin shkollor, se sa të arrijnë njohuri.

“Në dukje dolën disa mangësi, si në aspekt të furnizimit me mjete teknologjike, nxënësit nuk kishin mundësi të kyçen në procesin arsimor për shkak se nuk kishin mundësi të shfrytëzojnë internetin për shkak të gjendjes financiare të familjes, përkrahjen e dobët që e kanë marrë nga familja, mungesa e përkrahjes nga ana e mësuesve, i cili gjithashtu nuk ka qenë i trajnuar për teknologjinë informatike”, tha Vaska Bajramovska-Mustafa, zëvëndës Avokat i Popullit.

Zëvendës-avokatja e popullit, Vaska Bajramovska Mustafa tregon se kjo mënyrë e mësimit ka goditur më shumë tre kategori të fëmijëve apo nxënësve:

Kategoritë e prekura nga mësimi online

• Ata që jetojnë në mjedise rurale – për shkak të pamundësisë që të kyçen në internet
• Që vijnë nga familjet sociale – për shkak të pamundësisë për të siguruar mjete teknologjike
• Me nevoja të veçanta – për shkak të pamundësisë së adaptimit të mjeteve didaktike për nevojat e tyre.
  Propozojnë që në miratimin e protokolleve arsimore, të kyçur të jenë edhe prindërit, nxënësit dhe shërbimet profesionale të shkollave fillore dhe të mesme.
  Vaska Bajramovska Mustafa vlerëson se tash është koha që Ministria e Arsimit dhe Shkencës dhe Byroja për zhvillim të arsimit të tregojnë se gjatë gjysmëvjetorit të dytë dhe pushimit veror kanë punuar, dhe do të kemi një zgjidhje e cila do t’u sigurojë nxënësve arsimim cilësor.

“Në praktikë të tregojnë se kanë punuar me përkushtim për tejkalim të këtyre mangësive që të mund të kemi edukim të fëmijëve, sepse jorastësisht arsimimi është çelësi për shumë punë në suksesin e një personi, në ndërtimin e tij si person, të mos vijmë në situatë të dëmtojmë gjenerata të tëra dhe të përfundojmë arsim i cili do të jetë pro-formë, pa njohur dhe pa ndonjë shkathtësi”, u shpreh Vaska Bajramovska-Mustafa.

Nga Avokati i Popullit si mangësi të mësimit online e shohin edhe mungesën e trajnimeve për mësimdhënësit, ndërkaq vlerësojnë se edhe në rast se sillet vendimi për mësim me prani fizike, aty duhet të mbahet llogari që mos të rrezikohet shëndeti i nxënësve dhe mësimdhënësve.