Sipas The New York Times, presidenti i Sirisë, Ahmed al-Sharaa, ka bashkëpunuar fshehurazi me koalicionin e udhëhequr nga SHBA-të kundër grupeve terroriste ISIS dhe Al Kaeda që nga viti 2016, kur ai mori nën kontroll territore në veriperëndim të Sirisë.
Ky bashkëpunim, i cili më parë nuk ishte bërë publik, besohet të ketë luajtur një rol kyç në frenimin e rrjeteve ekstremiste në zonat kufitare, duke krijuar një bazë për afrimin e fundit diplomatik midis Damaskut dhe Washingtonit.
Siria, dikur bastion kryesor i Shtetit Islamik, po përjeton një kthesë historike të rrallë. Qeveria siriane ka deklaruar se do të bashkëpunojë me përpjekjet ndërkombëtare për të luftuar grupin terrorist, pas vizitës historike të Ahmed al-Sharaa në Shtëpinë e Bardhë të hënën, ku u takua me Presidentin Donald Trump.
Një ditë më pas, ministri sirian i Informacionit, Hamza al-Mustafa, njoftoi se al-Sharaa kishte nënshkruar një deklaratë bashkëpunimi politik me koalicionin e udhëhequr nga SHBA-të kundër ISIS-it.
Al-Sharaa, dikur i burgosur nga forcat amerikane në Irak dhe themelues i degës siriane të Al Kaedës, kishte një shpërblim prej 10 milionë dollarësh mbi kokë deri në dhjetor të vitit të kaluar – periudhë kur ai udhëhoqi ofensivën që rrëzoi nga pushteti diktatorin Bashar al-Assad.
Sipas zyrtarëve sirianë dhe diplomatëve perëndimorë, që folën për The New York Times në kushte anonimiteti, al-Sharaa ka qenë në bashkëpunim të fshehtë me koalicionin amerikan kundër ISIS dhe Al Kaedës që prej vitit 2016.
Që prej dhjetorit, forcat e sigurisë siriane po bashkëpunojnë me koalicionin global kundër ISIS-it, konfirmon edhe Mouaz Moustafa, drejtues i “Syrian Emergency Task Force”, një organizatë humanitare dhe lobuese me bazë në SHBA.
Ky zhvillim shënon një kthesë të jashtëzakonshme në dinamikën e Lindjes së Mesme – nga përplasja e gjatë me Perëndimin, në një aleancë të re që mund të riformësojë ekuilibrat e sigurisë në rajon.