Numërimi vetëm dhe vetëm sipas përkatësisë etnike duhet të bëhet pjesë e së kaluarës, apelon Presidenti i vendit Stevo Pendarovski, në intervistë për REL, duke shtuar se nuk pret që për shkak të tensioneve politike dikush të mund t’i komprometojë rezultatet e regjistrimit.
“Ne nuk mundemi edhe po të duam të dalim plotësisht nga kjo matricë e numërimit sipas përkatësisë etnike se në Kushtetutën tonë ka dispozitë se disa të drejta dhe statuse të caktuara u takojnë edhe atyre bashkësive joshumicë të cilët janë më pak se 20 për qind e popullsisë, duhet ta respektojmë, përndryshe jam dakord siç kaluam, para pak kohe festuam 20 vjetorin e Marrëveshjes së Ohrit, mendoj se numërimi vetëm dhe vetëm sipas përkatësisë etnike duhet të bëhet pjesë e historisë”, tha Pendarovski.
Në këtë ditë të parë të regjistrimit të popullsisë dhe amvisërive, kryetari i Kuvendit Talat Xhaferi përmes një postimi në Facebook apeloi që qytetarët të ndihmojnë për regjistrim të suksesshëm.
“Të gjithë qytetarët të japin kontributin e tyre për realizimin e suksesshëm të Regjistrimit, sepse regjistrimi i suksesshëm nënkupton të nesërme më të suksesshme për shoqërinë tonë”, u shpreh Talat Xhaferi – kryetar i Kuvendit të Maqedonisë së Veriut.
Edhe kryeministri Zoran Zaev përmes Facebookut bëri thirrje për bashkëpunim me regjistruesit me qëllim që pas 20 viteve të merren të dhëna e duhura që do të jenë bazë për krijimin e politikave të ardhshme.
“Që ky operacion të jetë i suksesshëm krahas profesionalizmit të të punësuarve në Entin Shtetëror për Statistikë dhe instruktorët e angazhuar dhe regjistruesit, nevojitet edhe bashkëpunimi nga të gjithë qytetarët. Prandaj ju bëj thirrje të bëheni pertnerë në këtë proces, sepse vetëm në këtë mënyrë Qeveria, institucionet publike, vetëqeverisja lokale dhe bashkësia e biznesit do të mund të sigurojnë jetë më të mirë për të gjithë qytetarët e Maqedonisë së Veriut”, deklaroi kryeministri Zaev.
Kryeministri po ashtu ka ndarë disa fakte historike rreth regjistrimit të popullsisë në territorin e Maqedonisë së Veriut. Të parët regjistrues që mbahen mend janë ata të shekullit 15 të cilët kanë regjistruar vetëm taksapaguesit dhe meshkujt. Më pas në shekullin 19 ka pasur regjistrim nga autoritete të huaja, ndërsa në Maqedoni regjistrimi i parë modern është realizuar në vitin 1921. Pas Luftës së Dytë Botërore e deri në vitin 2002 janë bërë 8 regjistrime. Ai i vitit 1991 nuk ka qenë i plotë, andaj u përsërit në 1994-tën, vit që shënon edhe regjistrimin e parë të Maqedonisë së Pavarur. I fundit është bërë në vitin 2002, ndërsa në 2011-tën dështoi.