Nuk shkurtohen rrogat, por shtesat dhe udhëtimet! Sindikatat e akuzojnë Qeverinë se po e shkel Kushtetutën dhe ligjet

TË FUNDIT

Nuk do të shkurtohen rrogat e të punësuarve në administratë, por do të shkurtohen shtesat për punë jashtë orarit të punës, udhëtimet zyrtare dhe shpenzimet për telefonat zyrtare të të punësuarve dhe funksionarëve, sqaroi për TV21 zëvendësministri për shoqëri informatike dhe administratë, Aleksandar Bajdevski pasi rekomandimet qeveritare për uljen e shpenzimeve të  punëtorëve në administratë shkaktuan reagime në opinion.

“Masat që kanë të bëjnë me të punësuarit dhe obligimin për 30% punë me rotacion, që të mos rrezikohet funksionimi normal të institucioneve do të thotë kursim në pjesën e shpenzimeve operative, kursim të energjisë elektrike, po ashtu institucionet do të duhet të kujdesen që të rritet produktiviteti i punëtorëve, të mos kemi situata për të paguar çdo muaj shuma më të larta për punë jashtë orarit të punës, ato shpenzime duhet të shkurtohen. Po ashtu të shkurtohen shpenzimet e funksionarëve dhe udhëheqësve të tjerë në institucionet”, tha Aleksandar Bajdevski, zëvendësministër për Shoqëri Informatike dhe Administratë.

Sa i përket punës nga shtëpia me rotacion, me reagim doli Sindikata e të punësuarve në drejtoritë, organet gjyqësore dhe shoqatat e qytetarëve ku anëtarë janë edhe pjesë e të punësuarve në sektorin publik. Thonë se me hap të këtillë të qeverisë shfuqizohet marrëveshja kolektive dhe shkelet kushtetuta, ligjet dhe konventat e Organizatës ndërkombëtare të punës që i ka nënshkruar shteti.

“Nëse të punësuarit i dërgojmë të punojnë në shtëpi, në vend që t’ua rrisim rrogat për shkak se do të harxhojnë më shumë energji elektrike, ushqim dhe shpenzime të tjera që i kemi si qytetarë të këtij shteti, ata sjellin masa, dërgojini njerëzit në shtëpi dhe njëkohësisht t’ua shkurtojmë rrogat”, tha Tërpe Deanoski, kryetar i Drejtorisë së organeve gjyqësore dhe shoqatave të qytetarëve.

Deanoski thirri qeverinë që t’i kyçë sindikatat në procesin e sjelljes së vendimeve për rrogat dhe për kursim.

“Qeveria duhet të prononcohet se çfarë dhe si mendon. Qeveria duhet t’i kyçë sindikatat në çdo propozim dhe çdo masë që planifikon që ta bëjë, ndërsa që ka të bëjë me rrogat ose masat e kursimit, por këtë nuk e bën”, pohoi Tërpe Deanoski, kryetar i Drejtorisë së organeve gjyqësore dhe shoqatave të qytetarëve.

Për masat e qeverisë reagoi edhe Lidhja e sindikatave të Maqedonisë. Nga LSM thonë se nuk guxon të anulohet ose të revidohet asnjë marrëveshje kolektive në nivel të degës ose marrëveshjet kolektive.