Një ditë para nisjes së agjërimit, qytetarët përgatiten për Ramazan! Ankohen për çmimet e larta

E premte. Një ditë para muajit të shenjtë të Ramazanit 2025.

Për nga ana e dekorimeve Çarshia nuk kishte ndonjë gjë të veçantë, por gjallëronte ndryshe.

Besimtarët lëvizin nga dyqani në dyqan, e në “Bit Pazar” nga tezga të tezgë.

Po bëjnë përgatitjet për muajin e shenjtë, kur sofrat e iftarit nuk janë si ato të muajve të tjerë, por u kushtohet më shumë vëmendje me gatimet.

Qytetarët me të cilët folëm ankohen për çmimet e larta, por thonë se nuk kanë zgjidhje tjetër, se patjetër duhet t’i blejnë.

-Jemi bërë gati shyqyr që na erdhi çfarë të bëjmë, shohim diçka mirëpo shtrenjtë!
-A mundeni të blini çfarë ju duhet?
-Jo nuk mundemi. Rrogë pak, ndihmë sociale 5-6 mijë denarë nuk dalin, nuk ka!
-Sot për çfarë keni dalë në treg?
-Sot dolëm të mbledhim ndonjë gjë, mirëpo shtrenjtë nuk kemi të holla, vetëm t’i shohim dhe të dalim.

-Jemi bërë gati por shumë shtrenjtë, ja 200 denarë këto çfarë do të marrësh, pa të holla çfarë do të marrësh, të gjitha gjërat janë shtrenjtuar.
-Më herët a ka qenë kështu?
-Nuk ka qenë! Bash kështu nuk ka qenë, kishte më lirë.
-A mendoni që tani qytetarët mund të blejnë çdo gjë që u nevojitet për Ramazan?
-Po, patjetër! Është sa është patjetër ta blesh. Kemi nuk kemi Ramazan.

-Nuk kanë rënë aspak, çfarë të them?!

Në këtë muaj të rëndësishëm për myslimanët, nuk mungon as solidariteti dhe dora e shtrirë ndaj atyre që kanë nevojë. Menaxheri i një restoranti afër “Bit Pazarit”, na tregoi se për skamnorët iftaret do të jenë falas.

“Kjo ofertë vlen për jetimët dhe skamnorët, nuk mund të vlejë për çdokënd. Ai që ka mundësi besoj që nuk mund të kontaktojë, por ai që nuk i ka mundësitë kërkon ndihmë nga ana jonë. Ne deri tani me përkrahjen e donatorëve mirë është duke shkuar”, tha Asan Asani.
-Sa do të zgjasë kjo, gjithë muajin e Ramazanit?
“Gjithë muajin e Ramazanit, prej nesër deri në fund të Ramazanit do t’i përkrahim skamnorët”, tha ai.

Sonte agjëruesit hanë syfyrin e parë. Në Shkup, agjërimi nis në orën 4.32 të mëngjesit, ndërsa iftari i parë është në orën 17.30.